मुंबई: बॉलिवूडचे लोकप्रिय आणि दिलदार अभिनेते नाना पाटेकर त्यांच्या अभिनयासोबतच त्यांच्या उदार स्वभावासाठीही ओळखले जातात. इंडस्ट्रीत त्यांचे अनेक मित्र त्यांच्या स्वभावाबद्दल किस्से सांगतात. असाच एक खास किस्सा सध्या चर्चेत आला आहे, ज्यात नानांनी आपल्या जिवलग मित्रासाठी, दिग्दर्शक एन. चंद्रा यांच्यासाठी चक्क आपलं स्वतःचं घर गहाण ठेवलं होतं.
एन. चंद्रा यांना 'अंकुश' या चित्रपटातून खरी ओळख मिळाली आणि याच चित्रपटाने नाना पाटेकरांनाही प्रसिद्धी मिळवून दिली होती. एन. चंद्रा जेव्हा मोठ्या आर्थिक अडचणीत सापडले होते आणि त्यांना पैशांची खूप गरज होती, तेव्हा त्यांनी नाना पाटेकरांकडे मदतीचा हात मागितला. त्यावेळी नाना पाटेकरांकडेही पुरेसे पैसे नव्हते. पण मित्राला अडचणीतून बाहेर काढण्यासाठी नानांनी जराही विचार न करता, आपलं घर गहाण ठेवून पैशांची व्यवस्था केली.
नानांच्या या मदतीमुळे एन. चंद्रा आर्थिक अडचणीतून बाहेर पडले. नंतर त्यांनी नानांचे पैसे लगेच परत केले आणि नानांना त्यांचं घर परत मिळालं. या मदतीबद्दल कृतज्ञता व्यक्त करण्यासाठी एन. चंद्रा यांनी नाना पाटेकरांना एक स्कूटर भेट दिली होती.
नाना पाटेकर हे फक्त मित्रांनाच नाही, तर अनेक गरजू लोकांनाही नेहमी मदत करत आले आहेत. त्यांच्या 'नाम फाउंडेशन' च्या माध्यमातून त्यांनी अनेक शेतकरी कुटुंबांना आणि सामाजिक कार्यांमध्येही सक्रिय योगदान दिलं आहे.
नानांच्या कामाबद्दल बोलायचं झालं तर, ते सध्या 'हाऊसफुल्ल ५' या सिनेमातून प्रेक्षकांच्या भेटीला येत आहेत आणि आगामी सिनेमांच्या शूटिंगमध्येही व्यस्त आहेत. नाना पाटेकर यांचा हा मैत्रीचा आणि उदार स्वभावाचा किस्सा त्यांची वेगळी बाजू दाखवतो, ज्यामुळे इंडस्ट्रीत आणि जनसामान्यांमध्येही त्यांना आदर मिळतो.
