नवी दिल्ली : भारतामध्ये महाराष्ट्रात सांगली येथे सिंथेटिक ड्रग तयार करण्याचा कारखाना चालवणारा ताहेर सलीम डोला हा वाँटेड आरोपी पोलीस शोधत असल्याचे लक्षात येताच यूएईला पळून गेला होता. त्याला यूएई येथे पकडण्यात आले. त्याचा ताबा मुंबई पोलिसांना देण्यात आला आहे. आंतरराष्ट्रीय पोलीस सहकार्य युनिट, केंद्रीय गुन्हे अन्वेषण संस्था अर्थात सीबीआय (Central Bureau of Investigation) आणि अबुधाबी येथील नार्कोटिक्स कंट्रोल ब्युरो अर्थात एनसीबी यांनी संयुक्त कारवाई करुन ताहेर सलीम डोला याला पकडले आहे.
भारताच्या रेड कॉर्नर नोटीसला प्रतिसाद देत यूएईमधून ताहेर सलीम डोलाला पकडण्यात आले आहे. पकडल्यानंतर अवघ्या काही तासांत त्याचा ताबा भारताला मिळाला आहे. मुंबईतील कुर्ला पोलीस ठाण्यात ताहेर सलीम डोला विरोधात ड्रगचा कारखाना चालवल्याप्रकरणी एक गुन्हा नोंदवण्यात आला आहे.
ताहेर सलीम डोला आणि इतरांशी संबंधित असलेल्या सांगलीच्या कारखान्यातून एकूण १२६.१४१ किलो मेफेड्रोन (एमडी) ड्रग (अमली पदार्थ) जप्त करण्यात आला आणि दोन हजार ५२२ लाख रुपये किमतीचे औषध जप्त करण्यात आले . ही कारवाई मुंबई पोलिसांनी सांगलीत जाऊन केली होती. कारवाई केल्यानंतर पोलिसांनी सीबीआयच्या मदतीने ताहेर सलीम डोला विरोधात रेड कॉर्नर नोटीस काढली होती. मुंबई पोलिसांच्या प्रयत्नांना अखेर यश मिळाले आहे. गेल्या काही वर्षांत इंटरपोलच्या सहकार्याने भारताने १०० पेक्षा जास्त आरोपींना परदेशातून पकडून भारतात आणले आहे.
