एअर इंडियाचे ड्रीमलायनर विमान गुरुवार १२ जून रोजी दुपारी अहमदाबादहून लंडनच्या दिशेने रवाना झाले. उड्डाण केल्यानंतर अवघ्या काही सेकंदात हे विमान कोसळले. या विमानात असलेल्या २४२ पैकी २४१ जणांचा मृत्यू झाला. याच विमानात गुजरातचे माजी मुख्यमंत्री विजय रुपाणी होते. त्यांचाही अपघातात मृत्यू झाला. विजय रुपाणी त्यांच्या लंडनमध्ये नातलगांकडे गेलेल्या पत्नीला परत आणण्यासाठी म्हणून जात होते, असे समजते. त्यांचा विमानातील आसन क्रमांक 2D असा होता. ते विमानात बसल्यानंतर एका महिला प्रवाशाने सेल्फी काढला होता. ही प्रवासी महिला रुपाणी जिथे बसले होते त्या पुढील रांगेतील खुर्चीत होती. तिने काढलेल्या सेल्फीत रुपाणी दिसत आहेत. हा सेल्फी, विमानाची तिकीट आणि बोर्डिग पास यावरुन रुपाणी विमानात होते हे निश्चित झाले होते. नंतर अपघातात त्यांचा मृत्यू झाल्याची माहिती आली.
एरवी विजय रुपाणी 1206 हा आकडा स्वतःसाठी लकी समजत होते. पण यंदाच्या वर्षातील सहाव्या महिन्याच्या बाराव्या तारखेला म्हणजे पुन्हा एकदा 1206 असताना त्यांचा अपघाती मृत्यू झाला.
अहमदाबाद पोलिसांनी दिलेल्या माहितीनुसार विमानातील २४१ जणांचा मृत्यू झाला आणि विमान जिथे कोसळले त्या भागातील काही नागरिकांचाही मृत्यू झाला. यामुळे अपघातात ठार झालेल्यांची एकूण संख्या २६५ झाली आहे. या अपघातात ठार झालेल्यांच्या नातलगांना टाटा समुहाकडून एक कोटी रुपयांची मदत दिली जाणार आहे. तसेच टाटा समूह जखमींच्या उपचारांचा खर्च करणार आहे. विमान ज्या कॉलेजच्या हॉस्टेलवर कोसळले त्या कॉलेजला हॉस्टेल नव्याने बांधण्यासाठीही मदत करणार असल्याचे टाटा समुहाकडून सांगण्यात आले.
रुपाणी पत्नीसह लंडनमध्ये एका कौटुंबिक सहलीसाठी जाणार होते. पण लुधियाना पश्चिम मतदारसंघात पोटनिवडणूक जाहीर झाली. पंजाब भाजपाचे प्रभारी असल्यामुळे रुपाणींनी पत्नीला लंडनला पाठवण्याची व्यवस्था केली पण स्वतः भारतात थांबले होते. प्रचाराचे काम संपल्यानंतर पत्नीला परत आणायचे आणि त्या निमित्ताने लंडनमधील ओळखीच्या लोकांना भेटून घ्यायचे म्हणून रुपाणी प्रवासाला निघाले होते. पण दुर्दैवाने त्यांच्यासाठी हाच शेवटचा प्रवास ठरला.
