महामंडळाच्या तिजोरीत जवळपास ५० कोटीं महसूल जमा
मुंबई : ई-शिवनेरी मुंबईकरांची लाडकी बनली असून एसटीचा आधुनिक चेहरा अशी ओळख असलेल्या ई-शिवनेरीच्या सेवेला दोन वर्ष पूर्ण झाले आहेत. या कालावधीत मुंबई-ठाणे-पुणे मार्गावर प्रवाशांनी या गाडीतून प्रवास केला आहे. ई-शिवनेरीमुळे महामंडळाच्या तिजोरीत जवळपास ५० कोटींची भर पडली असल्याने उदंड प्रतिसादात ई-शिवनेरीची घोडदौड दोन वर्षानंतरही कायम आहे अशी माहिती एसटीच्या अधिकाऱ्यांनी दिली.
मुंबई-पुणे मार्गावर ई-शिवनेरीच्या रोज २४ फेऱ्या होतात. या फेऱ्यांमधून १२ लाखांहून अधिक प्रवाशांनी प्रवास केला आहे. या फेऱ्यांमधून महामंडळाने ४९ लाख ८३ हजार रुपयांचे उत्पन्न मिळवले आहे. ठाणे-पुणे मार्गावरही प्रवाशांनी ई-शिवनेरीच्या प्रवासाला पसंती दिली.त्याचबरोबर ठाणे-पुणे ई-शिवनेरी जेव्हा सुरु झाली तेव्हा अवघ्या सात दिवसात दीड हजार प्रवाशांनी प्रवास करत २० लाखांहून अधिक महसूल मिळवला आहे. या मार्गावर सध्या १४ ई-शिवनेरी बस सुरू आहेत.
रोज ई-शिवनेरीच्या तीन फेऱ्या होतात. गेल्या ७ दिवसांत ८१ रुपये प्रति किमी या दराने २० लाख ६७ हजार रुपये ई-शिवनेरीने कमावले आहे, असे एसटी महामंडळाने स्पष्ट केले.
महाराष्ट्र दिनी अर्थात, एक मे २०२३ रोजी तत्कालीन मुख्यमंत्री एकनाथ शिंदे यांच्या उपस्थितीत ठाणे-पुणे मार्गावर पहिली ई-शिवनेरी धावली. परळमध्ये चार्जिंग स्टेशन सुरू झाल्यानंतर मेच्या पहिल्या पंधरवड्यात दादर-पुणे मार्गावर ई-शिवनेरी धावू लागली. शिवनेरी ही प्रामुख्याने दादर-पुणे, स्वारगेट या मार्गावर धावते.
दादर ते कळंबोलीपर्यंत अनेक प्रवासी शिवनेरी बस पकडतात. दादर, कुर्ला नेहरूनगर, मैत्री पार्क, मानखुर्द ,वाशी, सानपाडा, नेरुळ जंक्शन, खारघर, कळंबोली आणि पनवेल हे प्रमुख थांबे असून एकूण २२ शहर बस थांबे आहेत.
इलेक्ट्रिक बसेसची वैशिष्ट्य
इलेक्ट्रिक बस एकदा पूर्ण चार्ज केल्यानंतर ३५० किमीपर्यंत अंतर सहज कापू शकणार आहे. प्रत्येक सीटजवळ चार्जर, आरामदायक पुश बॅक सीट, वाय-फायसह मनोरंजनासाठी बसमध्ये टीव्ही आणि अत्याधुनिक इन्फोटेन्मेंट सिस्टिम आणि सेफ्टीसाठीही अनेक लेटेस्ट फीचर्स या इलेक्ट्रिक बसमध्ये कंपनीने दिले आहेत.
बसमध्ये चालक आणि सहचालक सोडून ४३ प्रवासी बसू शकतात.
फेरी संख्या
मे २०२३ रोज फेरी संख्या ६
मे २०२५ रोज फेरी संख्या २५
फेरी कालावधी
मे २०२३ दर तासाने
मे २०२५ - ३० मिनिटांनी
मुंबई फेऱ्या : २४
पुणे फेऱ्या : २४
