रत्नागिरी : चिपळूणहून रत्नागिरीकडे जाणाऱ्या खासगी ट्रॅव्हल्स मिनी बसला सीएनजी गॅस घेऊन जात असलेल्या टँकरने धडक दिल्याने अपघात झाला. अपघातानंतर मिनी बस वीस फूट खोल दरीत कोसळली. बावनदी परिसरात ही दुर्घटना घडली. टँकरमधून गॅसची गळती झाली. टँकर धडकेनंतर जवळ असलेल्या गुरांच्या गोठ्याला जाऊन धडकला. गोठ्याजवळ असलेल्या एका घराला पण या अपघाताचा फटका बसला. दुर्घटनेत गुरांचा गोठा जळून खाक झाला. आग लागल्यामुळे दोन गुरे जखमी झाली. घराजवळ उभी असलेली रिक्षा जळून गेली. घरावरील फायबरचे पत्रे जळून गेले. अपघातात वीस ते पंचवीसजण जखमी झाले. जखमींना तातडीने रत्नागिरी सिव्हिल रुग्णालयात दाखल करण्यात आले. घटनास्थळी पोलीस यंत्रणा, महसूल, अग्निशमन दल, स्थानिक पोहोचले असून मदतकार्य सुरू आहे. सीएनजी टँकर मधून होणारी गळती थांबवण्यात आली आहे. अपघात झाला त्यावेळी घरात असलेली माणसं आवाज ऐकून घराबाहेर आली. यामुळे धडकेनंतर टँकर गोठ्याला आणि गोठ्याजवळच्या घराला आपटला तरी घरातील रहिवासी सुरक्षित आहेत.
