पावसाळ्यानंतर बांधकामाला होणार सुरुवात, निधी प्राप्त
अलिबाग : जिल्हा पोलीस मुख्यालयाजवळच्या जुन्या पोलीस वसाहतीच्या जागी बांधण्यात येणाऱ्या नवीन वसाहतीची प्रतीक्षा आता संपलेली असून, याठिकाणी २१२ घरांची आठ मजली इमारत उभी राहणार आहे. पावसाळ्यानंतर या इमारतींच्या बांधकामाला सुरुवात होण्याची शक्यता आहे.
पोलीस मुख्यालय हे अलिबाग शहरात आहे. पोलिस दलात सेवा देणाऱ्या अधिकारी आणि कर्मचाऱ्यांसाठी ४० वर्षांपूर्वी मुख्यालय येथे बैठ्या चाळी बांधण्यात आल्या होत्या. कालांतराने बैठ्या चाळी जीर्ण होऊ लागल्याने त्यांची पडझड झाली. त्यामुळे एकेक चाळ रिकामी करून ती पाडण्यात आली. त्यामुळे सध्या वसाहतीची जागा मोकळीच आहे. अंमलदारांसाठी १९२, निरीक्षक १६, उपविभागीय पोलिस अधिकाऱ्यांसाठी चार अशी या नव्या इमारतीची रचना असेल. या बांधकामाला शासनाची परवानगी मिळालेली असून, बांधकामासाठी निधीही प्राप्त झाला आहे. निविदा करण्याची प्रक्रिया सुरू झाली असून, पावसाळा संपल्यानंतर या कामाला सुरुवात होणार आहे.
पोलीस मुख्यालयात पोलीस अंमलदारांसाठी एकूण ३६ शासकीय निवासस्थाने सुस्थितीत आहेत. प्रतीक्षा यादीप्रमाणे निवासस्थाने वाटप करण्यात आली आहेत. सद्य:स्थितीत पोलीस अंमलदार निवासस्थानासाठी २१ पोलीस अंमलदार प्रतीक्षा यादीवर आहेत. राखीव पोलीस निरीक्षक, पोलीस मुख्यालय यांचेकडून अधिकारी, अंमलदारांची सेवानिवृत्ती, बदली इत्यादी कारणांमुळे निवासस्थानांच्या वाटपाबाबत अहवाल कार्यालयात मंजुरीसाठी आल्यानंतर प्रतिक्षा यादीवरील पुढील अंमलदारांना त्या निवासस्थानाचे आवश्यकतेबाबत पुन्हा एकदा विचारणा होऊन वाटप करण्यात येणार आहे.
