भारताच्या आजी - माजी खासदारांचा जर्मनीत विवाह

बर्लिन : तृणमूल काँग्रेसच्या खासदार महुआ मोईत्रा आणि बिजू जनता दलचे माजी खासदार पिनाकी मिश्रा यांनी लग्न केले. भारताच्या या आजी - माजी खासदारांचा विवाह सोहळा जर्मनीत झाला. खासगी समारंभात निवडक पाहुण्याच्या उपस्थितीत त्यांनी लग्न केले. हे लग्न ३ मे रोजी झाले. पण त्याची बातमी महिनाभर लपवण्यात आली. अखेर महुआ मोईत्रा यांनी एक फोटो एक्स पोस्ट केल्यावर सर्वांनाच या लग्नाची माहिती मिळाली. पिनाकी मिश्रा चार वेळा बिजू जनता दलाकडून खासदार झाले आहेत. ते १९९६ मध्ये पहिल्यांदा खासदार म्हणून निवडून आले. त्यानंतर ते २००९ ते २०१९ पर्यंत खासदार होते. महुआ आणि पिनाकीच्या लग्नाच्या व्हायरल झालेल्या फोटोंमध्ये दोघांनी एकमेकांचे हात धरलेले दिसत आहेत. महुआने सोनेरी आणि हलक्या गुलाबी रंगाची साडी परिधान केल्याचे फोटोत दिसत आहे. लग्नाबाबत दोघांनी अधिकृत घोषणा केलेली नाही. पण केक कापत असतानाच फोटो एक्स पोस्ट करुन अभिनंदन करणाऱ्या अनेकांचे महुआ यांनी आभार मानले आहेत. यामुळे खासदार महुआ मोईत्रा आणि माजी खासदार पिनाकी मिश्रा यांनी लग्न केल्याची बातमी व्हायरल झाली आहे.

Thank you everyone for the love and good wishes!! So grateful pic.twitter.com/hbkPdE2X7z

— Mahua Moitra (@MahuaMoitra) June 5, 2025

महुआ यांचा जन्म १२ ऑक्टोबर १९७४ रोजी आसाममध्ये झाला. त्या आता ५० वर्षांच्या आहेत. इन्व्हेस्टमेंट बँकर म्हणून कारकिर्दीची सुरुवात करणाऱ्या महुआ यांनी २०१० मध्ये ममता बॅनर्जी यांच्या तृणमूल काँग्रेसमध्ये प्रवेश केला. महुआ २०१९ मध्ये पहिल्यांदा आणि २०२४ मध्ये दुसऱ्यांदा खासदार म्हणून निवडून आल्या.संसदेतील तृणमूल काँग्रेसचा आवाज अशी महुआ मोईत्रा यांची ओळख सांगितली जाते. महुआ पश्चिम बंगालमधील कृष्णनगर येथून सलग दुसऱ्यांदा खासदार झाल्या आहेत. महुआ मोईत्रा यांचे पती पिनाकी मिश्रा हे बिजू जनता दलचे नेते आहेत. त्यांचा जन्म २३ ऑक्टोबर १९५९ रोजी झाला. ते ६५ वर्षांचे आहेत. पिनाकी मिश्रा १९९६ मध्ये पहिल्यांदा खासदार झाले. त्यांनी तत्कालीन केंद्रीय मंत्री ब्रजेश किशोर त्रिपाठी यांचा पराभव केला. पिनाकी हे सर्वोच्च न्यायालयातले वरिष्ठ वकील आहेत. त्यांची तीन दशकांची दीर्घ राजकीय आणि वकिलीतली कारकीर्द आहे. ते अनेक उच्चस्तरीय समित्यांचे सदस्य देखील राहिले आहेत.