मेट्रो मार्ग क्र. ४ येथे ८ गर्डर स्थापित
मुंबई : मेट्रो मार्ग क्रमांक ४ (वडाळा–गाईमुख) अंतर्गत उभारण्यात येत असलेल्या कापुरबावडी स्थानक प्रकल्पामध्ये एका रात्रीत ८ यू-गर्डर्स यशस्वीरित्या स्थापित करण्यात आले. सदर कार्यवाही ही प्रकल्पाच्या अंमलबजावणीतील एक महत्त्वपूर्ण प्रगतीचा टप्पा म्हणून नोंदविण्यात येत आहे. हे स्थानक मेट्रो मार्ग क्रमांक ५ (ठाणे – भिवंडी–कल्याण) सोबत एकात्मिक होणारे प्रमुख स्थानक असून तत्वज्ञान विद्यापीठ जंक्शन येथे विकसित केले जात आहे.
या कार्यासाठी एकूण ९० कर्मचारी नियुक्त करण्यात आले होते, ज्यामध्ये २८ रिगर्स, १० कुशल कामगार, २० अकुशल कामगार तसेच ३५ वाहतूक समन्वय अधिकाऱ्यांचा समावेश होता. कार्याच्या सुरक्षित आणि कार्यक्षम अंमलबजावणीसाठी विविध प्रकारची यंत्रसामग्री वापरण्यात आली, ज्यामध्ये १ × ५५० टन क्षमतेची क्रेन, ३ × ५०० टन क्षमतेच्या क्रेन्स, ४ मल्टी-अॅक्सल वाहने, ४ व्होल्वो पुलर्स, ११ काउंटरवेट ट्रेलर्स, ६ मॅनलिफ्ट्स, ६ फराणा क्रेन्स, ४ आयशर ट्रक्स आणि ४ एस्कॉर्ट वाहने यांचा समावेश होता.
