पालिकेकडून ५३ हजार शोभिवंत झाडांचे नियोजन
वसई : वसई-विरार शहरात विविध प्रकारच्या कारणांमुळे प्रदूषण वाढू लागले आहे. हे प्रदूषण नियंत्रणासोबतच त्याचे प्रमाण कमी करण्यासाठी पालिकेकडून विविध प्रकारचे उपक्रम राबविण्यात येत आहेत. याच उपक्रमाच्या अंतर्गत शहराला प्रदूषण मुक्त ठेवण्यासाठी तसेच हवेतील प्राणवायूचे (ऑक्सिजन) प्रमाण वाढविण्यासाठी महापालिकेने यंदा शहराच्या विविध ठिकाणच्या रस्त्याच्या मध्ये असलेल्या दुभाजकांच्या मध्ये वृक्ष लागवड करण्याचा निर्णय घेतला आहे.
रस्त्याच्या मध्य भागी असलेल्या दुभाजकांच्या मध्येही व प्रमुख सर्कलच्या मध्ये विविध प्रकारची शोभिवंत ५३ हजार ६४१ इतक्या झाडांची लागवड केली जाणार आहे. त्यामुळे येत्या वर्षात दुभाजकही सौंदर्याने फुलणार आहेत. नव्याने तयार होणारे दुभाजक व यापूर्वीचे जे दुभाजक मोकळ्या स्थितीत आहेत अशा ठिकाणी ही झाडे लावली जाणार आहे. त्यामुळे रस्त्याने ये-जा करताना ही हिरवळ दिसून येईल. याशिवाय या झाडांमुळे पालिकेच्या शहर सौंदर्यात ही भर पडण्यास मोठी मदत होणार असल्याचे पालिकेकडून सांगण्यात आले आहे.
यापूर्वी २४ ठिकाणी लागवड
यापूर्वी शासनाच्या राष्ट्रीय स्वच्छ हवा कार्यक्रमांतर्गत (नॅशनल क्लीन एअर प्रोग्राम) ८५ लाख रुपये इतका निधी खर्च करण्यात आला होता. यासाठी शहरातील २४ ठिकाणी असलेल्या दुभाजकांची निवड करून दुभाजकांच्या मध्ये विविध प्रकारची शोभिवंत वृक्षांची लागवड करण्यात आली होती.
वसई-विरार शहरातील दुभाजकांच्या मध्येही शोभिवंत झाडे वृक्ष प्राधिकरण विभागाकडून लावली जाणार आहेत. त्याचे नियोजन करण्यात आले आहे.
- समीर भूमकर, उपायुक्त वृक्ष प्राधिकरण विभाग महापालिका
