लॉस एंजिल्स : प्रसिद्ध हॉलिवूड सिंगर रिहानाचे वडील रोनाल्ड फेंटी यांचे निधन झाले आहे. वयाच्या ७०व्या वर्षी त्यांनी लॉस एंजिल्स येथील रुग्णालयात शनिवारी (३१ मे) सकाळी अखेरचा श्वास घेतला. त्यांच्या मृत्यूचं नेमकं कारण अद्याप स्पष्ट झालेलं नाही, पण ते काही काळापासून आजारी होते, अशी माहिती समोर आली आहे.
रिहानाचा भाऊ राजद फेंटी काही दिवसांपूर्वी त्यांची रुग्णालयात भेट घेऊन गेला होता. त्यावेळी रोनाल्ड फेंटी सीडर-सिनाई मेडिकल सेंटरमध्ये उपचार घेत होते.
सध्या रिहानाकडून त्यांच्या वडिलांच्या निधनावर कोणतीही अधिकृत प्रतिक्रिया आलेली नाही. रिहाना आणि तिच्या वडिलांमधील संबंध काही वर्षांपासून बिघडले होते. २०१९ साली रिहानाने वडिलांवर फेंटी एंटरटेनमेंट या कंपनीच्या नावाचा परवानगीशिवाय वापर केल्याचा आरोप करत त्यांच्यावर केस दाखल केली होती.
दरम्यान, बारबाडोसच्या पंतप्रधान मिया मोटली यांनी रोनाल्ड फेंटी यांच्या निधनाबद्दल शोक व्यक्त केला आहे. "ही एक दुःखद बातमी आहे. रिहानाच्या घडणाऱ्या व्यक्तिमत्त्वात त्यांचा मोठा वाटा होता. त्यांनी अनेक लोकांवर प्रभाव टाकला आहे," अशा शब्दांत त्यांनी सोशल मीडियावर भावना व्यक्त केल्या.