मुंबई : कोस्टल रोड अर्थात किनारी रस्त्याच्या अंतिम टप्प्यातील जे. के. कपूर चौक येथून सुरू होणाऱ्या भुयारी मार्गाचे काम पूर्ण झाले आहे. आता कोस्टल रोडचा भुयारी मार्ग चारचाकी वाहने आणि प्रवासी बस यांच्यासाठी खुला झाला आहे. भुयारी मार्गात दुचाकी, तीनचाकी आणि अवजड वाहनांना प्रवेश नाही. प्रिन्सेस स्ट्रीट उड्डाणपूल ते वांद्रे वरळी सी लिंकच्या वरळी टोकापर्यंत १०.५८ किमीचा कोस्टल रोड अर्थात किनारी रस्ता प्रवासासाठी उपलब्ध आहे. यामुळे दादर - प्रभादेवी पट्ट्यातून नरिमन पॉइंट तसेच वांद्रे वरळी सी लिंकच्या दिशेने जाणारी वाहतूक वेगवान होणार आहे. हा मार्ग सकाळी सात ते रात्री बारा वाजेपर्यंत प्रवासाकरिता उपलब्ध असेल.
भुयारी मार्ग जे. के. कपूर चौक ते कोस्टल रोड, तसेच सागरी सेतूला (सी लिंक) जोडला गेला आहे. त्यामुळे खान अब्दुल गफ्फार खान मार्गावरुन सी लिंकला जाणारी वाहतूक कोंडी कमी होण्यास मदत होणार आहे. भुयारी मार्गातून दोन मार्ग निघतात. त्यातील एक मार्ग हा कोस्टल रोडकडे जाणारा तर दुसरा मार्ग हा वरळी सी लिंककडे जाणार आहे. त्यामुळे वाहतूक कोंडी कमी होण्यास मदत होणार आहे. प्रवासाच्या वेळेत बचत होणार आहे.
