जालिंदर सुपेकर हे वैष्णवीचा पती शशांक हगवणेचे मामा आहेत. हगवणे बंधुंना म्हणजेच शशांक आणि सुशील या दोघांना पुणे ग्रामीण पोलिसांकडून शस्त्र परवाना मिळत नव्हता. अखेर दोघांनी बनावट पत्त्याची कागदपत्रे तयार करुन पुणे शहर पोलिसांकडे शस्त्र परवान्यासाठी अर्ज केला. दोघांचे अर्ज मंजूर व्हावे यासाठी पडद्यामागून जालिंदर सुपेकर यांनीच हालचाल केली होती. तसेच कारागृह विभागात अधिकारी म्हणून कार्यरत असताना सुपेकर यांनी कैद्यांसाठी खरेदी करायच्या वस्तूंच्या व्यवहारात कोट्यवधी रुपयांचा घोटाळा केल्याचा आरोप होत आहे. या पार्श्वभूमीवर विशेष पोलीस महानिरीक्षक कारागृह विभाग जालिंदर सुपेकर यांची गृहरक्षक दलात उपमहासमादेशक या पदावर बदली झाली आहे.
याआधी सुपेकरांकडे कारागृह विभागाच्या तीन अंतर्गत विभागांचा अतिरिक्त कारभार दिलेला होता. हा कारभार राज्य शासनाने दोन दिवसांपूर्वीच काढून घेतला होता. आता त्यांची बदली करण्यात आली आहे. सुपेकर हे पोलीस महानिरीक्षक दर्जाचे अधिकारी आहेत. त्यांची बदली करताना त्यांना त्यांच्या मूळ विभागात राज्य पोलीस दलात पाठवण्यात आलेले नाही. तसेच त्यांची पदावनती करुन त्यांना उप महासमादेशक पद देण्यात आले आहे.
शस्त्र परवान्यासाठी बनावट कागदपत्रे सादर करुन फसवणूक केल्याप्रकरणी वैष्णवी हगवणेचा पती शशांक विरोधात वारजे आणि दीर सुशील विरोधात कोथरूड पोलीस ठाण्यात फसवणुकीचा गुन्हा नोंदवण्यात आला आहे. या प्रकरणात स्थानिक पोलीस ठाण्याचे अधिकारी हेच फिर्यादी आहेत. पोलिसांनी शशांक आणि सुशीलचा शस्त्र परावाना रद्द करण्याची प्रक्रिया सुरू केली आहे. पोलिसांनी हगवणे कुटुंबाचा नातलग नीलेश चव्हाण याचाही शस्त्र परवाना रद्द करण्याची प्रक्रिया सुरू केली आहे. शशांक, सुशील आणि नीलेश या तिघांचे शस्त्र पोलिसांनी जप्त केले आहे. नीलेशला नेपाळ सीमेजवळ अटक करण्यात आली आहे.
