देशात २०१३ - १४ मध्ये ३६.०५ अब्ज अमेरिकन डॉलरची थेट परदेशी गुंतवणूक झाली होती. तिथून भारताने प्रगती करत २०२३ - २४ मध्ये ७१.२८ अब्ज अमेरिकन डॉलरची थेट परदेशी गुंतवणूक मिळवली. यानंतर २०२४ - २५ या एका आर्थिक वर्षात भारतात ८१.०४ अब्ज अमेरिकन डॉलरची थेट परदेशी गुंतवणूक झाली आहे.
देशात २०२४ - २५ या एका आर्थिक वर्षात झालेल्या एकूण परकीय गुंतवणुकीपैकी १९ टक्के गुंतवणूक सेवा क्षेत्रात झाली. त्याखालोखाल १६ टक्के गुंतवणूक कॉम्प्युटर सॉफ्टवेअर आणि हार्डवेअर क्षेत्रात झाली. इतर व्यापारात आठ टक्के गुंतवणूक झाली. सेवा क्षेत्रातील गेल्या वर्षाच्या ६.६४ अब्ज अमेरिकन डॉलरच्या गुंतवणुकीत ४०.७७ टक्क्यांनी वाढ झाली. सेवा क्षेत्रात यंदा ९.३५ अब्ज अमेरिकन डॉलरची थेट परदेशी गुंतवणूक झाली आहे. याआधी २०२३ - २४ मध्ये सेवा क्षेत्रात १६.१२ अब्ज अमेरिकन डॉलरची थेट परदेशी गुंतवणूक झाली होती.
आर्थिक वर्ष २०२४ - २५ मध्ये देशात सर्वाधिक ३९ टक्के थेट परदेशी गुंतवणूक महाराष्ट्रात झाली. कर्नाटकमध्ये १३ टक्के, दिल्लीत १२ टक्के थेट परदेशी गुंतवणूक झाली. गुंतवणूक करणाऱ्या देशांमध्ये सिंगापूरमधून सर्वात जास्त ३० टक्के, मॉरिशसमधून १७ टक्के, अमेरिकेतून ११ टक्के थेट गुंतवणूक भारतात झाली.
मागील अकरा वर्षात (२०१४ ते २०२५) देशात ७४८.७८ अब्ज अमेरिकन डॉलरची थेट परदेशी गुंतवणूक झाली आहे. याआधीच्या अकरा वर्षांत (२००२३ ते २०१४) देशात ३०३.३८ अब्ज अमेरिकन डॉलरची थेट परदेशी गुंतवणूक झाली आहे. देशामध्ये २००२३ ते २०१४ च्या तुलनेत २०१४ ते २०२५ या कालावधीत १४३ टक्के जास्त अमेरिकन डॉलरची थेट परदेशी गुंतवणूक झाली आहे.
मागील २५ वर्षात देशात १०७२.३६ अब्ज अमेरिकन डॉलरची थेट परदेशी गुंतवणूक झाली आहे. यापैकी ७० टक्के थेट परदेशी गुंतवणूक २०१४ ते २०२५ दरम्यान देशत झाली आहे. भारतात थेट परदेशी गुंतवणूक करणाऱ्या देशांची संख्या २०१३ - १४ मध्ये ८९ होती ही संख्या २०२४ - २५ मध्ये ११२ झाली आहे.
