मुंबई: बोरिवली पश्चिम येथील लिंक रोडवरील ओम प्रथमेश या २१ मजली गगनचुंबी इमारतीची कार पार्किंग लिफ्ट कोसळून शुभम मदनलाल धुरी (वय-३०) या तरुणाचा मृत्यू झाल्याची घटना घडली. तर एक जण गंभीर जखमी असल्याचे सांगण्यात येत आहे.
बीएमसीने दिलेल्या माहितीनुसार, बोरिवली (पश्चिम) येथील लिंक रोडवरील ओम प्रथमेश इमारतीतील कार पार्किंगची लिफ्ट शनिवार, ३१ मे रोजी सकाळच्या सुमारास कोसळून झालेल्या अपघातात शुभम धुरी या एका तरुण मजूराचा मृत्यू, तर अन्य एक मजूर जखमी झाला. सुनजीत यादव (वय-४५) असे जखमी झालेल्या व्यक्तीचे नाव आहे. त्याच्या डोक्याला गंभीर दुखापत झाल्यामुळे त्याला उपचारासाठी रुग्णालयात दाखल करण्यात आले आहे. ही घटना आज सकाळी ११ वाजता घडली. या घटनेची माहिती मिळताच अग्निशमन दलाचे जवान तत्काळ घटनास्थळी दाखल झाले होते.
लिफ्टमध्ये अडकलेल्या दोघांना तात्काळ बाहेर काढण्यात आले, आणि गंभीर जखमी झालेल्या शुभमला पोलीस व्हॅनमधून बीडीबीए शताब्दी रुग्णालयात दाखल करण्यात आले, मात्र डॉक्टरांनी त्याला मृत घोषित केले. तर सुनजीत यादव यांच्या डोक्याला दुखापत झाल्याने पुढील उपचारासाठी त्यांच्यावर सीटी स्कॅन करण्यात येणार असल्याचे डॉक्टरांनी सांगितले आहे.