संघासोबत इंग्लंड दौऱ्यावर जाणार
नवी दिल्ली: योग्य पर्याय न मिळाल्याने बीसीसीआयने आगामी इंग्लंड दौऱ्यासाठी टी दिलीप यांची राष्ट्रीय संघाच्या क्षेत्ररक्षण प्रशिक्षकपदी पुन्हा नियुक्ती करण्याचा निर्णय घेतला आहे.
गेल्या महिन्यात ऑस्ट्रेलियाविरुद्धच्या भारताच्या खराब कामगिरीनंतर प्रशिक्षक स्टाफमध्ये बदल झाल्यानंतर दिलीप यांना काढून टाकण्यात आले होते. यानंतर, दिलीप यांचे काम सहाय्यक प्रशिक्षक रायन टेन डेस्केट पाहायचे. सुरुवातीला त्यांची जागा घेतील अशी अपेक्षा असलेले रायन टेनडेस्केट सहाय्यक प्रशिक्षक म्हणून कायम राहणार आहेत. दिलीप हे एक चांगले प्रशिक्षक आहेत. त्यांनी तीन वर्षांहून अधिक काळ (२०२१ पासून) संघासाठी चांगले काम केले आहे. ते यातील बहुतेक क्रिकेटपटूंना खूप जवळून ओळखतात म्हणून त्यांना मोठ्या मालिकेसाठी संघात समाविष्ट करणे चांगले होईल, अशी बीसीसीआयला आशा आहे. त्यामुळेच त्यांना पुन्हा संघात समाविष्ट करण्यात आल्याचे समजते आहे.
दरम्यान, २०२१ मध्ये टी दिलीप यांची भारतीय पुरुष क्रिकेट संघाचे क्षेत्ररक्षण प्रशिक्षक म्हणून नियुक्ती झाली. त्यांनी आर श्रीधर यांची जागा घेतली. २०२४ च्या टी-२० विश्वचषकानंतर त्यांचा कार्यकाळ संपला. त्यानंतर त्यांचा करार मार्च २०२५ पर्यंत वाढवण्यात आला; परंतु त्यांना मध्येच काढून टाकण्यात आले. पण बीसीसीआयला अजूनही त्यांचा पर्याय सापडलेला नाही. त्यामुळे आता त्यांना पुन्हा ही जबाबदारी देण्यात आली आहे. दिलीप यांनी २००७ ते २०१९ पर्यंत हैदराबाद क्रिकेट असोसिएशनसोबत कोचिंग करायला सुरुवात केली. त्यानंतर त्यांनी राष्ट्रीय क्रिकेट अकादमीमध्ये कोचिंग केले.