डोंबिवली : टिटवाळा परिसरातील वडवली गावात एका २९ वर्षीय तरुणावर तिघा अज्ञातांनी निर्घृण हल्ला केला. मिरची पावडर डोळ्यात फेकून त्याच्या डोक्यावर लोखंडी रॉडने वार करण्यात आले. या हल्ल्यात गंभीर जखमी झालेल्या तरुणावर सध्या खाजगी रुग्णालयात उपचार सुरू आहेत.
सर्वेश वासुदेव पाटील असे या जखमी तरुणाचे नाव असून तो चिकनचा पुरवठा करण्याचे काम करतो. मंगळवारी दुपारी तो आपल्या मित्रासह स्कुटरवरून ऑर्डर देण्यासाठी जात असताना ऍक्टिव्हावर आलेल्या तिघांनी त्याच्यावर हल्ला केला. डोळ्यात मिरची पावडर टाकून लोखंडी रॉडने डोक्यावर मारहाण करण्यात आली.
या प्रकरणी सर्वेशने कल्याण ग्रामीण पोलीस ठाण्यात तक्रार दाखल केली असून अविनाश वेदांश पाटील, मनीष दत्तात्रय पाटील आणि विनेश मनोहर पाटील या तिघांविरोधात गुन्हा नोंदवण्यात आला आहे. सध्या आरोपी फरार असून त्यांचा शोध पोलीस घेत आहेत.
हल्ल्याचे नेमके कारण स्पष्ट झाले नसले तरी, प्रकरण वैयक्तिक वादातून घडले असावे, असा पोलिसांचा प्राथमिक अंदाज आहे. अधिक तपास सुरू आहे.
