पिंपळनेर : ऐन उन्हाळ्यात सामोडे ग्रामपंचायत हद्दीतील ग्रामस्थांना अनेक दिवसांपासून पाणीटंचाईला सामोरे जावे लागत आहे. वारंवार तक्रारी करूनही ग्रामपंचायत त्याची दखल घेत नसल्यामुळे संतप्त महिलांनी अखेर विविध भांडे हातात घेऊन सामोडे चौफुलीवर रास्ता रोको आंदोलन केले.
रास्ता रोकोमुळे तब्बल एक ते दीड तास पिंपळनेर-सटाणा, पिंपळनेर- साक्री, पिंपळनेर- नवापूर या मार्गावर वाहनांच्या लांबच- लांब रांगा लागल्या होत्या. पाण्यासाठी महिलांनी वारंवार तक्रार करूनही पाण्याचे नियोजन होत नसल्याने अखेर परिसरातील सर्व महिलांनी एकत्र येत शुक्रवारी सकाळी १० वाजेच्या सुमारास रास्ता रोको आंदोलन केले. शनिवारपासून सुरळीतपणे नियमित पाणीपुरवठा केला जाईल असे आश्वासन सामोडे ग्रामपंचायतीचे सरपंच प्रतिनिधी दीपक भारुड यांनी दिले. आश्वासन मिळाल्यानंतर महिलांनी आपले रास्ता रोको आंदोलन मागे घेतले.
वारंवार करावे लागते आंदोलन : स्थानिक महिलांनी २१ मे रोजी देखील सामोडे ग्रामपंचायतीवर मोर्चा काढला होता त्यावेळी देखील ग्रामपंचायतीच्या वतीने त्यांना आश्वासन देण्यात आले होते. वारंवार येथील ग्रामस्थांना आश्वासनावर समाधान मानावे लागते.म्हणून संतप्त ग्रामस्थांनी थेट रास्ता रोको आंदोलन केले.
