एकनाथ आव्हाड
डोंबाऱ्याचा खेळ
आज या गावाला,
तर उद्या त्या गावाला
डोंबाऱ्याचा खेळ आला
चला जाऊ पाहायला
ढोलकीचा आवाज
कानावर जेव्हा पडतो
छोटासा पोरगा
दोरीवर मग चढतो
छान धरतो ठेका
तो ढोलकीच्या तालावर
रस्त्यावर चालावे तसा
सहज चाले दोरीवर
केवढे थरारक खेळ
नवे नवे तो दाखवतो
अंगावर येतो काटा
थरकाप जिवाचा उडतो
पोटाची खळगी भरण्या
होई जिवावर उदार
चार पैसे मिळवून
उचले कुटुंबाचा भार
जगण्यासाठी गावोगावी
नाचतो हा डोंबारी
डोंबाऱ्यांच्या पोराला आता
शाळाच देतेय उभारी
१) हात नाही, पाय नाही
लांबीने छोटा-मोठा
त्याला पाहताच अंगावर
सरसरून येतो काटा
शेतकऱ्यांच्या मित्राचे
एक नाव भुजंग
नागमोडी आकारात
कोण सरपटतो सांग?
२) स्वभावाने भित्रा
पळण्यात चपळ
शत्रू दिसताच
लगेच काढे पळ
दिसायला सुंदर
जंगलात दिसती फार
सांबर, चितळ
हे कोणाचे प्रकार?
३) बगळ्यासारखे
रूप त्याचे असे
पाणथळ जागेत तो
फिरताना दिसे
लांब मान, लांब पाय
चोच देखील लांब
कोणता हा पक्षी
नाव त्याचं सांग?
उत्तर -
१) साप
२) हरीण
३) करकोचा