मुंबई: कसोटी क्रिकेटमधून निवृत्ती घेतल्यानंतर भारतीय संघाचा कर्णधार रोहित शर्मा (Rohit Sharma) यांनी मुख्यमंत्री देवेंद्र फडणवीस (Devendra Fadnavis यांची त्यांच्या शासकीय निवासस्थानी जाऊन सदिच्छा भेट घेतली. त्यांच्या भेटीचे फोटो देवेंद्र फडणवीस यांच्या सोशल मीडिया अकाऊंटवर शेअर करण्यात आले आहेत.
सोशल मीडियाद्वारे कसोटी क्रिकेटमधून निवृत्ती घेत असल्याची घोषणा केल्यानंतर जवळजवळ एका आठवड्यानंतर, रोहितने राज्याचे मुख्यमंत्री देवेंद्र फडणवीस यांची काल, दिनांक 14 मे रोजी वर्षा बंगल्यावर भेट घेतली.
त्यांच्या भेटीचे फोटो शेअर करताना मुख्यमंत्री फडणवीस यांनी लिहिले, "माझ्या वर्षा निवासस्थानी भारतीय क्रिकेटपटू रोहित शर्माचे स्वागत करणे, भेटणे आणि त्यांच्याशी संवाद साधणे खूप छान वाटले. कसोटी क्रिकेटमधून निवृत्ती घेतल्याबद्दल आणि त्यांच्या प्रवासाच्या पुढील टप्प्यात यश मिळावे यासाठी मी त्याला शुभेच्छा देतो!"
It was great to welcome, meet and interact with Indian cricketer Rohit Sharma at my official residence Varsha. I extended my best wishes to him on his retirement from Test cricket and for continued success in the next chapter of his journey!@ImRo45#Maharashtra #Mumbai… pic.twitter.com/G0pdzj6gQy
— Devendra Fadnavis (@Dev_Fadnavis) May 13, 2025
रोहित शर्माची कसोटी कारकीर्द
गेल्या आठवड्यात रोहित शर्माने त्याच्या कसोटी कारकिर्दीला पूर्णविराम दिला. त्याच्या काळातील सर्वोत्तम फलंदाजांमध्ये गणल्या जाणाऱ्या रोहितने ६८ कसोटी सामन्यांमध्ये ४०.५७ च्या सरासरीने ४३०१ धावा केल्या आहेत. त्याने १२ कसोटी शतके झळकावली असून १८ अर्धशतकांचादेखील यात समावेश आहे.
रोहितची कसोटी कारकीर्द फेब्रुवारी २०१० पासून सुरू झाली. त्याने कोलकात्यात पदार्पणातच १७७ धावांची शानदार खेळी करत आपल्या आगमनाची घोषणा केली. सलामीवीर म्हणून त्याच्या पहिल्याच कसोटी मालिकेत, रोहितने दक्षिण आफ्रिकेविरुद्ध घरच्या मैदानावर झालेल्या तीन कसोटी सामन्यांमध्ये एक द्विशतक आणि दोन शतके झळकावत हे स्थान पक्के केले.
जवळजवळ सहा वर्षे, रोहितने भारतासाठी मधल्या फळीत फलंदाजी केली आणि वेळोवेळी चमकदार कामगिरी करूनही सातत्य राखण्यासाठी संघर्ष केला. ऑक्टोबर २०१९ मध्ये त्याला डावाची सुरुवात करण्यासाठी बढती देण्यात आली ज्यामुळे त्याच्या कसोटी कारकिर्दीत एक वेगळाच बदल झाला.
गेल्या आठवड्यात एका इंस्टाग्राम पोस्टमध्ये रोहितने लिहिले की तो कसोटी क्रिकेटमधून निवृत्त होत आहे पण एकदिवसीय सामन्यांसाठी उपलब्ध राहील. तसेच गेल्या वर्षी विश्वचषकात भारताचे नेतृत्व केल्यानंतर त्याने त्याच्या टी-२० कारकिर्दीमधूनही निवृत्ती घेतली होती.
आयपीएल स्पर्धेमध्ये दिसणार रोहित शर्मा
रोहित शर्मा यंदाची उर्वरित आयपीएल स्पर्धा (IPL 2025) खेळणार आहे. भारत आणि पाकिस्तानच्या तणावामुळे आयपीएलची स्पर्धा स्थगित करण्यात आली होती. त्यानंतर उर्वरित सामने 17 मे पासून खेळवण्यात येणार आहे.
