दहशतवादाविरुद्धच्या लढाईत रशियाचा भारताला पूर्ण पाठिंबा
नवी दिल्ली: भारत आणि पाकिस्तानमधील वाढत्या (India pakistan Tension)तणावादरम्यान, रशियाचे राष्ट्राध्यक्ष व्लादिमीर पुतिन यांनी सोमवारी पंतप्रधान नरेंद्र मोदी यांना फोन केला. दहशतवादाविरुद्धच्या लढाईत भारताला पूर्ण पाठिंबा देणार असल्याचे त्यांनी पुन्हा एकदा सांगितले. जम्मू काश्मीर येथील पहलगाममध्ये झालेल्या दहशतवादी हल्ल्याचा त्यांनी यावेळी निषेध केला, आणि हल्ल्यात मृत्युमुखी पडलेल्या लोकांबद्दल शोक व्यक्त केला आहे.
परराष्ट्र मंत्रालयाचे प्रवक्ते रणधीर जयस्वाल यांनी ट्विटरवर पोस्ट केले आहे की, मोदी आणि पुतीन संभाषणादरम्यान, रशियन राष्ट्राध्यक्षांनी हल्ल्यामागील आणि त्यांच्या समर्थकांना चोख प्रत्युत्तर दिले पाहिजे यावर भर दिला. जम्मू आणि काश्मीरमधील पहलगाम येथे झालेल्या दहशतवादी हल्ल्यानंतर जवळजवळ दोन आठवड्यांनी पुतिन यांनी भारताला पाठिंबा दर्शवला आहे.
वार्षिक शिखर परिषदेसाठी पंतप्रधान मोदींनी पुतीन यांना केले आमंत्रित
पंतप्रधान नरेंद्र मोदी यांनी रशियाचे अध्यक्ष व्लादिमीर पुतिन यांना विजय दिनाच्या ८० व्या वर्धापन दिनानिमित्त शुभेच्छा दिल्या. या वर्षाच्या अखेरीस भारतात होणाऱ्या वार्षिक शिखर परिषदेसाठी पंतप्रधान मोदीं यांनी रशियन राष्ट्राध्यक्षांना आमंत्रित केले. यापूर्वी, रशियाचे परराष्ट्र मंत्री सर्गेई लावरोव्ह यांनी पहलगाम दहशतवादी हल्ल्याबाबत एस जयशंकर यांच्याशी फोनवर चर्चा केली होती. त्यांनी दोन्ही देशांना संयम बाळगण्याचे आवाहन केले होते.
भारत-पाकिस्तान परिस्थितीवर संयुक्त राष्ट्र सुरक्षा परिषदेची बैठक
पहलगाम दहशतवादी हल्ल्यानंतर भारत आणि पाकिस्तानमधील परिस्थितीवर संयुक्त राष्ट्र सुरक्षा परिषदेची सोमवारी बंद दाराआड बैठक होणार आहे. या मुद्द्यावर पाकिस्तानने आपत्कालीन बैठक बोलावण्याची मागणी केली. दहशतवादी हल्ल्यानंतर भारताने पाकिस्तानविरुद्ध अनेक कठोर निर्णय घेतले आहेत, ज्यात सिंधू पाणी करार स्थगित करणे, अटारी सीमा बंद करणे आणि राजनैतिक संबंध मर्यादित करणे यांचा समावेश आहे.
