कोल्हापूर : छत्रपती शिवाजी महाराजांबद्दल आक्षेपार्ह भाषेचा वापर केल्याप्रकरणी अटक केलेल्या प्रशांत कोरटकरला कोल्हापूर न्यायालयाने आणखी दोन दिवसांची पोलीस कोठडी ठोठावली. सध्या पोलीस कोठडीतच असलेल्या प्रशांत कोरटकरचा पोलिसांकडचा ताबा आणखी दोन दिवसांनी वाढला आहे.
Crime : पुण्यातील तरुणीची बंगळुरूत हत्या; तुकडे करुन बॅगेत भरले
अटक केल्यानंतर प्रशांत कोरटकरला पोलीस कोठडीची मागणी करण्यासाठी पहिल्यांदा पोलिसांनी कोल्हापूर न्यायालयात हजर केले होते. त्या दिवशी एका छत्रपती शिवाजी महाराजप्रेमी व्यक्तीने कोरटकर कोल्हापुरी चप्पल उगारण्याचा अयशस्वी प्रयत्न केला होता. तर यावेळी न्यायालयाच्या आवारात एका वकिलानेच कोरटकरवर हल्ला करण्याचा प्रयत्न केला. शिवाजी महाराजांची बदनामी करतोस का, असा सवाल करत अमित भोसले नावाच्या वकिलाने कोरटकरवर झडप घातली. पोलिसांनी त्यांना दूर केले. यानंतर कोरटकर जवळ आणखी पोलीस उभे राहिले आणि परिस्थिती नियंत्रणात आणण्यात आली.
छत्रपती शिवाजी महाराजांची बदनामी केल्यानंतर फरार झालेल्या प्रशांत कोरटकरला कोल्हापूर पोलिसांनी तेलंगणातील एका काँग्रेस पदाधिकार्‍याच्या घरातून अटक केली. यानंतर कोरटकरला कोल्हापूरमध्ये आणण्यात आले. सध्या कोरटकर पोलीस कोठडीत आहे.