Gaza: गाझामध्ये हवाई हल्ला, आणखी ३४ जणांचा मृत्यू

गाझा: इस्रायलने उत्तर गाझातील बैत लाहिया शहरातील एका रहिवासी इमारतीवर केलेल्या हवाई हल्ल्यात किमान ३४ जणांचा मृत्यू झाला आहे. मृतांमध्ये अनेक महिला आणि लहान मुलांचा समावेश असल्याचे स्थानिक संरक्षण एजन्सीने सांगितले. हल्ल्यामुळे संबंधित इमारतीचे अवशेषच शिल्लक असून ढिगाऱ्याखाली अनेक जण अडकल्याची भीती व्यक्त केली जात आहे.

हमासच्या संरक्षण विभागाने दिलेल्या माहितीनुसार, या हल्ल्यात सात जण जखमी झाले असून, सततच्या हल्ल्यांमुळे जखमींवर उपचार अत्यंत कठीण झाले आहे. इस्रायली हल्ल्यांमुळे गाझामध्ये आरोग्यसेवा आणि बचाव कार्यही संकटात आले आहे.

इस्रायली संरक्षण दलाने सांगितले की, या हवाई हल्ल्यांचे लक्ष्य हमासच्या कट्टरतावादी तळांवर आहे. बैत लाहियातील हल्ल्यासोबतच उत्तर गाझातील जबालिया भागातही कारवाई करण्यात आली. इस्रायलच्या लष्कराने हमासला पुन्हा संघटित होऊ नये यासाठी या मोहिमा राबवल्या असल्याचे स्पष्ट केले. मात्र, या कारवायांमध्ये अनेक नागरिकांचे प्राण जात असून, हल्ल्यांमुळे गाझामधील परिस्थिती अधिक बिकट झाली आहे.

गेल्या आठवड्यात जबालियातील हल्ल्यात २५ जण मृत्युमुखी पडले होते, त्यात १३ लहान मुलांचा समावेश होता. या हिंसाचारामुळे उत्तर गाझातील किमान १.३० लाख लोकांना स्थलांतर करावे लागले आहे. हमासच्या आरोग्य मंत्रालयाच्या माहितीनुसार, या युद्धामध्ये आतापर्यंत ४३,००० जणांनी प्राण गमावले आहेत.

गाझातील नागरिकांवर केलेल्या हल्ल्यांमुळे युद्धकालीन नियमांचा भंग होत असल्याचा आरोप ह्युमन राइट्स वॉचने केला आहे. त्यांच्या मते, इस्रायली कारवाया मानवतेविरोधात गुन्ह्यांच्या श्रेणीत येतात. इस्रायलने युद्धग्रस्त भागातील नागरिकांना सुरक्षित स्थळी हलवण्यासाठी कोणत्याही प्रभावी उपाययोजना न केल्याचा आरोप आहे.

उत्तर गाझा पट्टीतील लोकांवर हवाई हल्ल्यांचा तीव्र परिणाम झाला आहे. संपूर्ण कुटुंबे उद्ध्वस्त होत असून, मुलांसह महिलाही या संघर्षाचा मोठा बळी ठरत आहेत. इस्रायली हल्ल्यांमुळे गाझातील परिस्थिती अधिकच गंभीर बनली असून, मानवी जीवनावर मोठा परिणाम होत आहे.