मुंबई : लालबागचा राजा हा मुंबईतला प्रसिद्ध गणपती आहे. नवसाला पावणारा गणपती अशी लालबागचा राजा गणपतीची ख्याती आहे. दरवर्षी लालबागच्या राजाच्या चरणी भरभरुन दान दिले जाते. हे वर्षही त्याला अपवाद नाही. दहा दिवसांमध्ये लालबागच्या राजाच्या चरणी पाच कोटी सोळा लाख रुपये रोख रक्कमेचे दान आले आहे. साडेतीन किलो सोने आणि ६४ किलो चांदी यावेळी लालबागच्या राजाच्या चरणी दान करण्यात आली आहे.
लालबागच्या राजाच्या चरणी दरवर्षी भरभरुन दान भक्त करतात. तर या दानाची मंडळाकडून मोजदाद देखील करण्यात येते. लालबागच्या राजाच्या दानपेटीत आलेल्या सोने आणि चांदीचा लिलाव केला जातो. त्यामधून जी रक्कम जमा होते, त्यामाध्यमातून विविध सामाजिक उपक्रम राबवले जातात. तर राजाच्या चरणी दरवर्षी कोट्यवधी रुपयांचे दान भाविकांकडून केले जाते.
लालबागच्या राजाचे दर्शन घेण्यासाठी गणेश चतुर्थीच्या एक दिवस आधीपासूनच भक्तांनी रांगेत उभे राहण्यास सुरुवात केली होती. तर यंदाही रोख रक्कम, सोने आणि चांदीचे भरभरुन दान करण्यात आले आहे. पहिल्याच दिवशी भाविकांकडून केलेल्या दानामध्ये ४२ लाख रुपयांची रोख रक्कमेची नोंद करण्यात आली. तर १९८.५५० ग्रॅम सोने आणि ५४४० ग्रॅम चांदीच्या वस्तू राजाच्या चरणी अर्पण करण्यात आल्या होत्या. तर दुसऱ्या दिवशी लालबागच्या राजाच्या चरणी ६०, ६२, ००० रोख रक्कमेच्या दानाची नोंद करण्यात आली आहे. तर राजाला दुसऱ्या दिवशी १८३.४८० ग्रॅम सोन्याचे दान भाविकांकडून करण्यात आले आहे. तसेच ६,२२२ ग्रॅम चांदीच्या दानाची नोंद करण्यात आली.
अनंत अंबानींकडून २० कोटींचा मुकूट
पहिल्याच दिवशी लालबागच्या राजाच्या दर्शनासाठी जवळपास २० लाखांहून अधिक भाविकांनी दर्शन घेतले असल्याचा अंदाज व्यक्त करण्यात आला होता. पहिल्याच दिवशी सामान्य नागरिकांसह अनेक बॉलिवूड कलाकार, राजकीय नेत्यांनी लालबागच्या राजाचे दर्शन घेतले. याच लालबागच्या राजाला अनंत अंबानी यांनी २० किलो सोन्याचा मुकूट भेट दिला होता. या मुकूटाची किंमत २० कोटी रुपये आहे. अनंत चतुर्दशीच्या दिवशी लालबागच्या राजाचं विसर्जन करण्यात आलं त्याआधी राजाचा मुकूट काढून ठेवण्यात आला. हा सोन्याचा मुकूट आता लॉकरमध्ये ठेवण्यात आला आहे.
