Kolkata News : कोलकात्याच्या एसएन बॅनर्जी रोडवर स्फोट; एक जण जखमी!

कोलकाता : पश्चिम बंगालच्या कोलकाता येथील तलतल्ला परिसरात आज, शनिवारी दुपारी एसएन बॅनर्जी रोडवर रस्त्याच्या कडेला ठेवलेल्या स्टीलच्या टिफिनचा अचानक स्फोट होऊन एक जण गंभीर जखमी झाला. बापी दास असे जखमीचे नाव असून त्याच्या हाताला स्फोटात गंभीर इजा झाली आहे. त्याला तात्काळ रुग्णालयात दाखल करण्यात आले, तेथे त्याच्यावर उपचार सुरू असल्याचे पोलिसांनी सांगितले.

स्फोटाची माहिती मिळताच पोलीस आणि बॉम्बशोधक पथक घटनास्थळी पोहोचले. शिवाय, घटनास्थळी फॉरेन्सिक तज्ञही तैनात करण्यात आले आहेत, जे स्फोट कसा आणि कोणत्या परिस्थितीत झाला हे शोधण्याचा प्रयत्न करत आहेत. हा परिसर तातडीने सील करण्यात आला असून संपूर्ण परिसरात सुरक्षा दलांची तैनाती वाढवण्यात आली आहे. या अपघातामागे काही संघटित कट असण्याची शक्यता नाकारता येत नाही, असे पोलीस अधिकाऱ्यांचे म्हणणे आहे. या प्रकरणाचा तपास करण्यासाठी सुरक्षा यंत्रणा प्रत्येक कोनातून वस्तुस्थिती तपासत आहेत.

या स्फोटामुळे स्थानिक नागरिक आणि प्रशासकीय अधिकारी हादरले आहेत. सुरक्षा व्यवस्थेवर प्रश्न उपस्थित होत असून या घटनेनंतर संपूर्ण परिसरात अतिरिक्त दक्षता घेण्यात येत आहे. जखमी बापी दास यांची प्रकृती चिंताजनक असून डॉक्टर त्यांच्या प्रकृतीवर सतत लक्ष ठेवून आहेत. स्फोटाची कारणे लवकरात लवकर शोधून दोषींवर कारवाई केली जाईल, असे पोलिसांनी सांगितले. सुरक्षा एजन्सी घटनास्थळाच्या आसपास सर्व संभाव्य पुरावे गोळा करत असून या मार्गावरून नागरिकांची ये-जा बंद करण्यात आलीय.