मुंबई : मुंबईकरांची लाईफलाईन मानली जाणाऱ्या लोकलबाबत (Mumbai Local) एक महत्त्वाची बातमी समोर आली आहे. रेल्वे प्रशासन सध्या गोरेगाव आणि कांदिवली दरम्यान सहावी मार्गिका बसवण्यासाठी ३५ दिवसांचा मेगाब्लॉक (Megablock) सुरु केला आहे. यामध्ये अनेक लोकल रद्द करण्यात आल्यामुळे प्रवाशांचा खोळंबा होत असल्याचे चित्र दिसून येत आहे.
अशातच पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, मालाड रेल्वे स्टेशनवरील मधल्या फलाटांचे क्रमांक देखील बदलण्यात येणार आहेत. त्यामुळे काही दिवस प्रवाशांना गर्दीचा त्रास सहन करावा लागण्याची शक्यता वर्तवण्यात येत आहे. जाणून घ्या स्थानकावरील नवी रुपरेषाबाबत सविस्तर माहिती.
काय आहेत बदल?
- प्लॅटफॉर्म क्रमांक १ - फलाट क्रमांक १ वर धीम्या लोकलमधील प्रवाशांसाठी पश्चिम दिशेच्या दरवाजातून चढण्या-उतरण्याची सुविधा आहे. परंतु आता चढण्या-उतरण्यासाठी पूर्वेकडील दरवाजाचा वापर करावा लागणार आहे. १ सप्टेंबर २०२४ पासून हे बदल लागू होतील.
- प्लॅटफॉर्म क्रमांक २ - ८ सप्टेंबरपासून चर्चगेट दिशेला जाणाऱ्या धीम्या लोकलमध्ये पश्चिमेकडील दरवाजाचा वापर चढण्या-उतरण्यासाठी करावा लागणार आहे.
