पॅरिस : भारतासाठी पॅरिस ऑलिम्पिकच्या तिसऱ्या दिवशी आनंदाची बातमी आली. बॅडमिंटनमद्ये चिराग आणि सात्विकच्या जोडीने क्वार्टर फायनलमध्ये पोहोचत इतिहास रचला. तर टेबल टेनिसमध्ये मनिका बत्राने ऑलिम्पिक टेबल टेनिस इव्हेंटमध्ये अंतिम ३२मध्ये फ्रान्सच्या १२व्या सीडेड प्रिथीका पवाडेला सरळ गेम्समध्ये हरवले.
कॉमनवेल्थ गेम्सची चॅम्पियन आणि १८वी सीडेड मनिकाने ३७ मिनिटे चाललेल्या या सामन्यात ११-९, ११-६, ११-९, ११-७ असे हरवले. तर ऑलिम्पिक टेबल टेनिसच्या अंतिम १६मध्ये पोहोचणारी ती पहिली भारतीय खेळाडू ठरली आहे.
मनिकाला पहिल्या गेममध्ये विजय मिळवण्यास संघर्ष करावा लागला. शेवटचे तीन गुण मिळवत तिने हा सामना ११-९ असा जिंकला. दुसऱ्यामध्ये ६-६ अशी बरोबरी असताना त्यानंतर मनिकाने प्रिथीकाला कोणतीच संधी दिली नाही.
तिसऱ्या गेममध्ये हीच लय कायम राखत मनिकाने ५ अंकांची सरशी घेतली मात्र प्रिथिकाने ९-१० असा स्कोर केला. मात्र प्रिथीका दबावात आली आणि तिने हा गेम गमावला. चौथ्या गेममध्ये मनिकाने ६-२ अशी आघाडी घेत चांगली सुरूवात केली. नंतर ही आघाडी १०-४ अशी वाढवली. मात्र हा ही गेम तिने जिंकला.
