सुरक्षेच्या कारणास्तव शाळा, व्यावसायिक आस्थापने, वित्तीय संस्था बंद
ह्यूस्टन : अमेरिकेतील (America) टेक्सास राज्यात 'बेरील' चक्रीवादळाने (Beryl Cyclone) प्रचंड हाहाकार माजवला आहे. 'बेरील' या शक्तिशाली वादळामुळे पूरस्थिती (flood) निर्माण झाली आहे. वादळामुळे किमान ४ जणांचा मृत्यू झाला आहे. सुमारे ३० लाख घरे आणि व्यावसायिक आस्थापनांची वीज गेली आहे. त्यामुळे सर्वत्र अंधाराचे साम्राज्य पसरले आहे. यावरून वादळ किती भयंकर आहे, याचा अंदाज येतो.
राष्ट्रीय चक्रीवादळ केंद्राने सोमवारी संध्याकाळी सांगितले की, बेरील श्रेणी एक प्रकारातील वादळाने माटागोर्डाजवळ उग्र स्वरूप धारण केले. सध्या वादळामुळे झालेल्या नुकसानीचे मूल्यांकन कर्मचाऱ्यांनी सुरू केले आहे. स्थानिक लोकांना घरीच राहण्याचे आवाहन केले आहे. “फक्त स्वच्छ आकाशामुळे धोका टळला आहे, असे समजू नका.” असे महापौर जॉन व्हिटमायर यांनी सांगितले आहे.
राष्ट्रीय चक्रीवादळाचा हाहाकार
राष्ट्रीय चक्रीवादळ केंद्राने सांगितले की, पूर्व टेक्सास, पश्चिम लुइसियाना आणि अरकांससच्या काही भागात पूर आणि जोरदार पर्जन्यवृष्टी होण्याची शक्यता आहे. या दरम्यान घरांवर झाडे पडल्याने, २ लोकांचा मृत्यू झाला. तसेच पुराच्या पाण्यात अडकून ह्यूस्टन पोलीस विभागातील एका कर्मचाऱ्याचा मृत्यू झाला, तर आग लागण्याच्या घटनेत एका व्यक्तीचा मृत्यू झाल्याचे माहिती मिळाली आहे.
धोका संपलेला नाही
सध्या कर्मचाऱ्यांनी नुकसानीचे मूल्यांकन सुरू केले आहे. अधिकाऱ्यांनी स्थानिक लोकांना घरीच राहण्याचे आवाहन केले आहे. महापौर जॉन व्हिटमायर यांनी पत्रकार परिषदेत सांगितले की, "फक्त स्वच्छ आकाशामुळे धोका टळला आहे असे समजू नका." अजुनही परिस्थिती बिकट आहे. किती नुकसान झाले आहे याबाबत सध्या काही सांगता येणार नाही.