रे रोड येथील भीषण आगीत गोदाम जळून खाक

मुंबई : दक्षिण मुंबईतील रे रोड परिसरातील दारुखाना येथील गोदामाला गुरूवारी सकाळी सव्वा दहाच्या सुमारास भीषण आग लागली. या आगीत संपूर्ण गोदाम जळून खाक झाल्याची माहिती समोर येत आहे. सुदैवाने या आगीत कोणतीही जीवितहानी झालेली नाही. सध्या अग्निशमन दलाकडून या आगीवर नियंत्रण मिळवण्याचे काम शर्तीच्या प्रयत्नांवर सुरू आहे.

मिळालेल्या माहितीनुसार, रे रोड परिसरातील दारुखाना, ब्रिटानिया कंपनी शेजारी असलेल्या देवीदयाळ कंपाऊंड येथे तळमजला आणि एकमजली गोदाम होते. या गोदामाला अचानक आग लागली. सुरुवातीला ही आग छोटी होती. पण काही वेळातच आगीने रौद्र रूप धारण केले. संपूर्ण दारुखाना परिसरात धुराचे लोट पसरले होते. त्यानंतर या आगीची माहिती मिळताच घटनास्थळी अग्निशमन दलाच्या जवानांनी धाव घेतली.

या आगीची माहिती मिळताच आग भीषण स्वरूपाची असल्याने अग्निशमन दलासोबत स्थानिक पोलीस, महापालिका वार्ड स्तरावरील यंत्रणा, बेस्ट उपक्रम आदी यंत्रणा आणि रुग्णवाहिका यांची व्यवस्था करण्यात आली होती. अग्निशमन दलाचे संबंधित अधिकारी व जवान हे आग विझविण्यासाठी शर्थीचे प्रयत्न करीत असल्याचे समजते.

या गोदामाला नेमकी आग कशामुळे लागली याची माहिती अद्याप अस्पष्ट आहे. अग्निशमन दलासोबत स्थानिक पोलीस या आगीचा तपास करत आहेत. सुदैवाने या आगीत कोणतीही जीवितहानी झालेली नाही. मात्र, मोठ्या प्रमाणात गोदामाचे नुकसान झाले आहे.