Tuesday, July 23, 2024
Homeसाप्ताहिककिलबिल'फसलेला रविवार' कविता आणि काव्यकोडी

‘फसलेला रविवार’ कविता आणि काव्यकोडी

फसलेला रविवार

ठरवले मी या रविवारी, आरामात उठणार
घड्याळाच्या काट्यावर, मुळीच नाही पळणार
बिछान्यात शिरून,
मनसोक्त लोळणार
मैदानावरसुद्धा मी,
हवे तेवढे खेळणार
बागेतल्या गुलाबांशी,
गप्पाही मारणार
तबला, पेटी, गाण्यात,
मस्त रंग भरणार
रविवारचे हे सारे बेत,
मीच केले पास
रविवार माझा असेल,
एकदम झकास!
पण रविवार उजाडला, मोठ्या नाखुशीने
पाहुणे झाले हजर, सकाळच्याच गाडीने
घाई, गडबड आवाजाने,
घर गेलं भरून
झोप माझी पळाली,
बसलो डोकं धरून
पाहुण्यांची सरबराई, करण्यात दिवस गेला
बेत माझे सारेच, अहो, पडले बाजूला
पाहुण्यांचं बोलणं ऐकून,
मी तर चक्रावलो
म्हणे, “आज रविवार,
म्हणूनच मुद्दाम आलो.”

काव्यकोडी – एकनाथ आव्हाड

१) अभिनयाची आवड
भूमिकेचा अभ्यास
भाषा, शब्दोच्चार
हवेत बरं खास

वेशभूषा, रंगभूषा
संवाद तोंडपाठ
रंगमंचावर सांगा
घालतात कशाचा घाट?

२) वर्णनात्मक, अनुभवकथन
कधी आत्मकथन
कल्पनाप्रधान, वैचारिक
या प्रकारांत करती लेखन

दिलेल्या विषयावर
करतो सुसंगत मांडणी
शाळेत आपण हे लिहितो
आठवलं तर सांगा कोणी?

३) दिनांक, स्थळ, वेळेचा
उल्लेख असतो अचूक
संबंधित व्यक्तीच्या नावात
होत नाही बरं चूक

शीर्षक, उपशीर्षक
असतो याचा गाभा
वर्तमानपत्राच्या रकाण्यात
कोण घेतं जागा?

 उत्तरे :

१) नाटक

२) निबंधलेखन

३) बातमी

 

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra

RELATED ARTICLES
- Advertisment -

Most Popular

- Advertisment -