नवी दिल्ली : आम आदमी पक्षाचे प्रमुख आणि दिल्लीचे मुख्यमंत्री अरविंद केजरीवाल यांना दारू घोटाळा प्रकरणात अटकेपासून दिलासा देण्यास नकार देत दिल्ली उच्च न्यायालयाने ईडीकडून उत्तर मागितले आहे. उच्च न्यायालयात या प्रलंबित याचिकेसह या याचिकेवरही २२ एप्रिलला सुनावणी होणार आहे.
दिल्ली उच्च न्यायालयात लंच ब्रेकनंतर सुरू झालेल्या सुनावणीदरम्यान ईडीने कोर्टाला सांगितले की कोणत्या पुराव्यांच्या आधारे केजरीवाल यांना चौकशीसाठी बोलावले जात आहे. ईडीने न्यायालयाला आग्रह केला होता की तथ्ये केवळ न्यायालयाने पाहावीत. अरविंद केजरीवाल यांच्या वकीलांना दाखवू नये. ईडीकडून सांगण्यात आले की हे कोणतीही निवडणूक लढवत नाहीत. ते विपश्यनेला कधीही जातात मात्र ईडीकडे जात नाहीत. कोर्टाने ईडीला म्हटले की तुम्ही इतके समन्स पाठवले आहेत तर सरळ अटक का करत नाहीत.
ईडीने म्हटले की आम्हाला त्यांची बाजू जाणून घ्यायची आहे. त्यांनी आमच्यासमोर येऊन आमच्या प्रश्नांची उत्तरे द्यावीत.
ईडीचे पथक धडकले केजरीवाल यांच्या घरी
दिल्ली उच्च न्यायालयाने दिल्लीचे मुख्यमंत्री अरविंद केजरीवाल यांना अटकेपासून दिलासा देण्यास नकार दिल्यानंतर अंमलबजावणी संचालनालयाचे पथक आज गुरुवारी संध्याकाळी केजरीवाल यांच्या घरी पोहोचले. केजरीवाल आज ईडीच्या ९ व्या समन्सवर हजर झालेले नव्हते. त्यानंतर ईडीची तपास यंत्रणा थेट केजरीवाल यांच्या घरी धडकली आहे.
