मुंबई: भारतीय क्रिकेट संघाचा कर्णधार रोहित शर्माने अफगाणिस्तानविरुद्ध तिसरा टी-२० सामना जिंकत नवा इतिहास रचला. रोहितने या दरम्यान दिग्गज एमएस धोनीचा रेकॉर्डही मोडीत काढला. भारताने बंगळुरूमध्ये खेळवण्यात आलेल्या तिसऱ्या टी-२० सामन्यात अफगाणिस्तानला दुसऱ्या सुपर ओव्हरमध्ये १० धावांनी हरवले. तसेच अफगाणिस्तानला ३-० असे क्लीन स्वीप केले.
दोन्ही संघादरम्यान पहिल्यांदा टी-२० मालिकेचे आयोजन करण्यात आले होते. भारताने यावेळी अफगाणिस्तानविरुद्ध ३-० असे निर्भेळ यश मिळवले. ३६ वर्षीय रोहित शर्माच्या नेतृत्वात भारताचा ५४ टी-२०मधील हा ४२वा विजय आहे. रोहित टी-२०मध्ये सर्वाधिक सामने जिंकणारा भारतीय कर्णधार बनला आहे. या दरम्यान त्याने कॅप्टन कूल धोनीचाही रेकॉर्ड मोडला. धोनीच्या नेतृत्वात भारताने ७२ सामन्यांपैकी ४१ टी-२० सामने जिंकले होते. मात्र आता हा रेकॉर्ड रोहित शर्माच्या नावावर आहे. तिसरा टी-२० सामना अतिशय रोमहर्षक झाला. रोहितने या सामन्यात टी-२० आंतरराष्ट्रीय करिअरमधील ५वे शतक ठोकले.
रोहितचे आंतरराष्ट्रीय टी-२० करिअरमधील ५वे शतक
रोहित टी-२० आंतरराष्ट्रीय क्रिकेटमध्ये सर्वाधिक शतक ठोकणारा फलंदाज ठरला आहे. याशिवाय या फॉरमॅटमध्ये भारताकडून सर्वाधिक धावा करणारा कर्णधार बनला आहे. या दरम्यान त्याने विराट कोहलीचा रेकॉर्डही मोडीत काढला. रोहित टी-२० आंतरराष्ट्रीय क्रिकेटमध्ये सर्वाधिक षटकार ठोकणारा कर्णधार बनला आहे. तसेच टी-२० आंतरराष्ट्रीय क्रिकेटमध्ये सर्वाधिक धावांची खेळी कऱणारा भारताचा कर्णधार बनला आहे.
सहाव्यांदा टी-२०मध्ये प्लेयर ऑफ द मॅच
रोहित शर्माने अफगाणिस्तानविरुद्धच्या तिसऱ्या सामन्यात ६९ बॉलमध्ये नाबाद १२१ धावा केल्या. या दरम्यान त्याने ११ चौकार आणि ८ षटकार ठोकले. हिटमॅनला त्याच्या या शानदार खेळीसाठी प्लेयर ऑफ दी मॅच निवडण्यात आले. टी-२० कर्णधार रोहितने ५५ सामन्यांपैकी सहाव्यांदा हा खिताब मिळवला आहे. तर भारतीय संघाने टी-२०मध्ये ९व्यांदा एखाद्या संघाला क्लीन स्वीप केले आहे.
