मुंबई : ड्युटीवरून घरी जाताना एका पोलीस कर्मचाऱ्यावर काळाने घाला घातला. गाडीवरून जाताना पतंगाचा मांजा गळ्याला लागल्याने गळा चिरून त्याचा जागीच मृत्यू झाल्याची धक्कादायक घटना घडली आहे. सुरेश जाधव असे या पोलीस कर्मचाऱ्याचे नाव असून त्याच्या मृत्यूमुळे हळहळ व्यक्त केली जात आहे.
सुरेश जाधव हे दिंडोशी पोलीस स्टेशनमध्ये कार्यरत होते. ते ड्युटी संपल्यानंतर घरी निघाले. वरळी येथे त्यांचे निवासस्थान आहे. सांताक्रूजमधील वाकोला ब्रिज या ठिकाणी आल्यानंतर मांजाने त्यांचा गळा चिरला. उपचारासाठी त्यांना सायन रुग्णालयात नेल्यानंतर त्यांना मृत घोषित करण्यात आले.
याबाबत दिंडोशी पोलीस ठाण्यातून एक निवदेन जारी करण्यात आले आहे. यात म्हटले आहे की, आज रोजी दिंडोशी पोलीस स्टेशनचे पोलीस शिपाई क्र 111615/ समीर सुरेश जाधव वय 37 वर्षे, रा ठी. बिल्डिंग न 77, वरळी बी डी डी चाळ, रूम नं. 28, वरळी, मुंबई हे 15.30 वाजताचे सुमारास त्यांचे कर्तव्य पूर्ण करून मोटार सायकलवरून त्यांचे वरळी येथील निवासस्थानी जात असताना वाकोला ब्रिज, सांताक्रुज पुर्व याठिकाणी मांजाने गळा चिरल्याने त्यांना खेरवाडी मोबाईल 1 यांनी उपचार कामी तात्काळ सायन रुग्णालयात नेले असता डॉक्टरांनी त्यांना तपासून मयत घोषित केले आहे.
सदरची माहिती खेरवाडी पोलीस स्टेशनचे वपोनि राजेंद्र मुळीक यांनी 18.06 वाजता मोबाईल द्वारे दिली.
