छत्रपती संभाजीनगर : मराठा आंदोलन (Maratha andolan) चिघळलं असून अद्याप यावर तोडगा न निघाल्याने मराठा आंदोलक चांगलेच पेटून उठले आहेत. बीडमध्ये (Beed) आमदार प्रकाश सोळंके (Prakash Solanke) यांचं घर तर माजलगाव नगरपरिषदही (Majalgaon Nagarparishad) पेटवण्यात आली. या घटना ताज्या असतानाच आता छत्रपती संभाजीनगरमधूनही (Chhatrapati Sambhajinagar) मराठा आंदोलक आक्रमक झाल्याची माहिती आहे. भाजप आमदार प्रशांत बंब (Prashant Bamb) यांचं गंगापूर शहरातील कार्यालय मराठा आंदोलकांनी फोडलं आहे. त्यामुळे संभाजीनगरात खळबळ उडाली आहे.
प्रशांत बंब यांच्या कार्यालयात अचानक घुसलेल्या मराठा आंदोलकांनी कार्यालयातील सामानाची नासधूस केली. काचा फोडल्या, तसेच खुर्च्या देखील तोडल्या आहेत. यावेळी आंदोलकांनी जोरदार घोषणाबाजी केली. तसेच बंब यांचे कार्यालय फोडल्यानंतर गंगापूर शहरातील छत्रपती शिवाजी महाराज चौकात रास्ता रोको करत जोरदार घोषणाबाजीही करण्यात आली.
