मद्यपान करुन चालवत होता बस...
पुणे : पुण्यात एक धक्कादायक घटना (Pune News) घडली आहे. पीएमपीएमएलच्या (PMPML Bus) बसचालकाने एका वाहन चालकाशी झालेल्या वादामुळे विचित्र कारभार केला. रागाच्या भरात येऊन त्याने बस रिव्हर्स घेत १० ते १५ गाड्यांना उडवलं. प्रवाशांनी ओरडून मदत मागितली तरी बसचालकाने थांबायचे नाव घेतले नाही. सेनापती बापट रोडवर असलेल्या वेताळबाबा चौकामध्ये या चालकाने हे कृत्य केले. पोलिसांनी तात्काळ कारवाई करत या बसचालकावर कलम ३०८ अंतर्गत सदोष मनुष्यवधाचा गुन्हा दाखल केला आहे.
निलेश सावंत असं या आरोपी पीएमपीएल बस चालकाचं नाव आहे. त्याचा एका वाहन चालकाशी काही कारणास्तव वाद झाला. या वादामुळे त्याला राग अनावर झाला आणि त्याने बस उलटी चालवत १० ते १५ गाड्यांना ठोकर दिली. बस चालकाने दारूच्या नशेत बस उलटी चालवल्याचा आरोप बसमधील प्रवाशांनी आणि स्थानिकांनी केला आहे. दरम्यान, कृष्णा जाधव यांनी जीवाची परवा न करता काही लोकांना वाचवलं आहे.
चतु:श्रृंगी पोलीस स्टेशनमध्ये बस चालकावर सदोष मनुष्यवधाचा गुन्हा दाखल करण्यात आला आहे. सदर पीएमपीएमएल बसमध्ये ५० प्रवासी प्रवास करत होते. ही घटना घडत असतानाच बसमधील प्रवाशांनी ओरडून मदत मागितली. पण, बस चालकाने बस थांबवली नाही. यामध्ये काही गाड्याचं नुकसान झालं आहे. तर काही लोक जखमी देखील झाले आहेत. बसचालकाचा हा विचित्र कारभार त्याला चांगलाच महागात पडणार आहे.
