नवी दिल्ली : माहिती-तंत्रज्ञान क्षेत्रातील कंपन्यांमध्ये नोकरकपात वेगाने सुरू आहे. २०२२च्या तुलनेत २०२३ मध्ये माहिती-तंत्रज्ञान कंपन्यांनी ४० टक्के अधिक नोकरकपात केली आहे. २ लाख २६ हजार कर्मचाऱ्यांना या कंपन्यांनी घरी बसवले आहे.
अल्टइंडेक्स डॉट कॉमने दिलेल्या वृत्तानुसार, गेल्यावर्षीच्या तुलनेत यंदा माहिती-तंत्रज्ञान क्षेत्रातील परिस्थिती अधिक गंभीर आहे. त्यामुळे यंदा मोठ्या प्रमाणात या कंपन्यांमध्ये नोकरकपात सुरू आहे.
जानेवारी ते डिसेंबर २०२२ मध्ये कंपन्यांनी १ लाख ६४ हजार ७४४ कर्मचाऱ्यांना घरी बसवले होते. यंदा जानेवारीत ७५ हजार ९१२, फेब्रुवारीत ४० हजार नोकरकपात केली. जागतिक अर्थव्यवस्थेतील अनिश्चितता, महागाई, पुरवठा साखळीतील अडथळे, महसुलात होणारी घट यामुळे माहिती-तंत्रज्ञान कंपन्यांनी २०२३ मध्ये मोठी नोकरकपात केली. यात गुगल, मेटा, मायक्रोसॉफ्ट व ॲमेझॉन अशा बड्या कंपन्यांचा समावेश आहे. या सोबतच काही लहान कंपन्यांनीदेखील नोकरकपात केली आहे.