अजितदादा आणि नितीन गडकरींचेही केले तोंडभरुन कौतुक
पुणे : पुण्यातील चांदनी चौकातील नव्या उड्डाणपुलाच्या उद्घाटनानिमित्त (Chandani Chowk flyover) आयोजित केलेल्या कार्यक्रमात आज राज्याचे उपमुख्यमंत्री देवेंद्र फडणवीस (Devendra Fadnavis) आणि उपमुख्यमंत्री अजित पवार (Ajit Pawar) यांनी एकमेकांचे भरभरुन कौतुक केले. यावेळी बोलताना देवेंद्र फडणवीसांनी पुण्यात बस, मेट्रोला जोडणारे ‘वन कार्ड’ (One card) सुरु करण्याचे आदेश देऊन पुणेकरांसाठी आणखी एक खुशखबर दिली.
मेट्रो, बससह पुण्याशी जोडणाऱ्या या सर्व ट्रान्सपोर्ट सिस्टिम्सना ‘वन कार्ड’ योजनेनं जोडण्याच्या सूचना उपमुख्यमंत्री देवेंद्र फडणवीस यांनी केल्या आहेत. महा मेट्रोचे एमडी श्रावण हार्डिकर यांच्यासह पुणे महापालिका, पिंपरी-चिंचवड महापालिका प्रशासनाला तशा सूचना करण्यात आल्या आहेत. हे वनकार्ड पीएमपीच्या बसला (PMP Buses) देखील लागू होईल, अशा प्रकारचं झालं पाहिजे. म्हणजे आता या वनकार्डवर आपली मेट्रो आणि बस सिस्टिम एकत्रित चालली पाहिजे, असं फडणवीस यावेळी म्हणाले.
काय आहे वनकार्ड?
पंतप्रधान मोदींच्या मते वनकार्ड हे केवळ पुणे मेट्रोसाठी नाही तर पुण्यातल्या सार्वजनिक वाहतूक व्यवस्थेबरोबरच या कार्डवर देशभरातील सार्वजनिक वाहतूक व्यवस्था आणण्याचा आपण प्रयत्न करत आहोत. पुढच्या काळात मुंबईला गेलो तरी पुण्याचं कार्ड दाखवून मुंबईच्या मेट्रोत प्रवास करता येईल, असं हे वनकार्ड आहे.
अजितदादांचे आणि नितीन गडकरींचे कौतुक
पुण्यावर प्रेम करणारा अजित पवार यांच्यासारखा नेता आमच्यासोबत असल्यामुळे विकासाला आणखी गती मिळेल असं वक्तव्य उपमुख्यमंत्री देवेंद्र फडणवीस यांनी केलं. वाहतूक कोंडीत अडकून लोकांना दिवसा चांदण्या दिसायच्या म्हणून या चौकाला चांदणी चौक हे नाव पडले असे मला वाटत होते. पण अजित पवारांनी माझ्या ज्ञानात भर घातली. अजितदादांनी या चौकाला चांदणी चौक हे नाव का पडलं ते सांगितल्याचे फडणवीस म्हणाले.
नितीन गडकरी (Nitin Gadkari) साहेबांच्या पुण्यावर, राज्यावर असलेल्या प्रेमामुळे वेगवेगळे प्रकल्प होत आहेत, याचा आनंद असल्याचे फडणवीस म्हणाले. पंतप्रधान नरेंद्र मोदी जेवढ्या वेळा पुण्यात आले तेवढ्या वेळेस दुसरे कोणतेही पंतप्रधान पुण्यात कधी आले नाहीत. ते आणखीही पुण्यात येतील असे फडणवीस म्हणाले.
Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra