नितीन देसाई यांच्या कुटुंबियांकडून पहिली प्रतिक्रिया
मुंबई : कला दिग्दर्शक नितीन देसाई यांच्या आत्महत्येनंतर (Nitin Desai suicide case) आता कारणे समोर येऊ लागली आहेत. आत्महत्येनंतर सापडलेल्या वॉईज रेकॉर्डरमध्ये एडेलवाईज कंपनीने (Edelweiss Company) नितीन देसाई यांचा मानसिक छळ केल्याचा उल्लेख असल्याने त्या प्रकरणी चौकशी सुरु आहे. दरम्यान, नितीन देसाई यांची मुलगी मानसी देसाई (Manasi Desai) हिने यावर पहिल्यांदा भाष्य केले आहे. एडेलवाईज कंपनीने नितीन देसाई यांना खोटी आश्वासने दिली, माझ्या बाबांनी कोणालाही फसवलं नाही, असा आरोप मानसी देसाईने केला आहे.
मानसी देसाई म्हणाली, गेली दोन वर्षे डोनर कंपनीसोबत मीटिंग्ज करुन खूप प्रयत्न केले. यात कर्ज फेडण्यासाठीच्या उपायांवरही चर्चा झाली होती. कंपनीनेही त्यांना आश्वासनं दिली की सगळं हँडल करु आणि कंपनीदेखील कर्ज फेडण्यात मदत करेल. पण कंपनीने एकीकडे कायदेशीर कार्यवाही सुरु केली.
पुढे ती म्हणाली, गुंतवणूकदार पण बाबांची मदत करण्यासाठी तयार होते. पण कंपनीने काही मदत करु दिली नाही. माझी सगळ्यांना हीच विनंती आहे की पुढे बाबांबद्दल काहीही खोट्या किंवा चुकीच्या बातम्या पसरवू नका. माझ्या बाबांनी खूप मेहनत करुन त्यांचं नाव कमावलं होतं, ते मातीत मिळवू नका, अशी विनंती मानसी देसाई यांनी केली.
Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra.