मुंबई (प्रतिनिधी) : सॅम करनची फटकेबाजी आणि अर्शदीप सिंगच्या विकेट मिळवणाऱ्या गोलंदाजीने पंजाब किंग्सला शनिवारी विजय मिळवून दिला. घरच्या मैदानात म्हणजेच वानखेडेवर रंगलेल्या या सामन्यातील पराभवामुळे मुंबईच्या विजयी घोडदौडला ब्रेक लागला. कॅमेरॉन ग्रीन आणि सूर गवसलेला सूर्यकुमार यादव यांची तुफानी अर्धशतके व्यर्थ गेली.
पंजाबने दिलेल्या २१५ या मोठ्या लक्ष्याचा पाठलाग करताना इशान किशनने निराश केले. अवघी एक धाव करून किशन माघारी परतला. त्यानंतर रोहित शर्मा आणि कॅमेरॉन ग्रीनने फलंदाजीची सूत्रे हाती घेत मुंबईच्या धावसंख्येला आकार दिला. ४४ धावा करत रोहितने ग्रीनची साथ सोडली. सूर्यकुमार यादवला या सामन्यात सूर गवसला. त्याने ग्रीनच्या साथीने अप्रतिम फटकेबाजी करत मुंबईला विजयाच्या वाटेवर आणून ठेवले. परंतु सामन्याचा शेवट करणे त्याला जमले नाही. ग्रीनने ४३ चेंडूंत ६७, तर सूर्याने २६ चेंडूंत ५७ धावा जोडल्या. सूर्याने आपल्या खेळीत ७ चौकार आणि ३ षटकार लगावले. तर ग्रीनने ६ चौकार आणि ३ षटकार फटकवले. ही जोडगोळी बाद झाल्यावर टिम डेव्हीड मुंबईच्या विजयासाठी प्रयत्नशील होता. परंतु त्याला जमले नाही. अखेर २० षटकांत ६ फलंदाजांच्या बदल्यात मुंबईची मजल २०१ धावांपर्यंतच पोहचू शकली. पंजाबच्या विजयाचा शिल्पकार अर्शदीप सिंग ठरला. त्याने ४ षटकांत २९ धावा देत ४ फलंदाजांना माघारी पाठवले.
पंजाब किंग्सने निर्धारित २० षटकांत ८ फलंदाजांच्या बदल्यात २१४ धावा केल्या. कर्णधार सॅम करनच्या वादळी अर्धशतकच्या जोरावर पंजाबने २०० धावांचा पल्ला ओलांडला. सॅम करनने ५५ धावांची वादळी खेळी केली. तर हरप्रीत सिंह भाटियाने जबदरस्त ४१ धावांचे योगदान दिले.
पंजाब किंग्सकडून प्रभसिमरन सिंह आणि मॅथ्यू शॉर्ट सलामीला उतरले होते. पण शॉर्ट लवकरच तंबूत परतला. दोघांमध्ये पहिल्या विकेटसाठी फक्त १८ धावांची भागिदारी केली. कॅमरुन ग्रीन याने शॉर्ट याला ११ धावांवर तंबूत पाठवले. त्यानंतर मराठमोळ्या तायडेने प्रभसिमरनसोबत धावांचा पाऊस पाडला. पंजाबने सहा षटकांत ५८ धावा केल्या. पण त्याचवेळी अर्जुन तेंडुलकरने प्रभसिमरनला २६ धावांवर बाद केले. ६५ धावांवर पंजाबला दुसरा धक्का बसला. त्यानंतर संघाची धावसंख्या ८२ असताना लियम लिव्हिंगस्टोनही तंबूत परतला. पीयूष चावलाने लिव्हिंगस्टोन आणि तायडे यांना तंबूचा रस्ता दाखवला.
लागोपाठ दोन विकेट पडल्यामुळे पंजाबचा डाव ढेपाळला होता. पण त्याचवेळी कर्णधार सॅम करन आणि हरप्रीत सिंह यांनी डावाला आकार दिला. दोघांनी वेगाने धावा जमवल्या. सॅम करन आणि हरप्रीत भाटिया या दोघांनी पाचव्या विकेटसाठी ५० चेंडूंत ९२ धावांची भागिदारी केली. त्यानंतर सॅम करन बाद झाला. सॅम करन याने चार षटकार आणि पाच चौकारांच्या मदतीने २९ चेंडूंत ५५ धावांची खेळी केली. तर हरप्रीत सिंहने ४१ धावा तडकावल्या. सॅम करन बाद झाल्यानंतर अखेरच्या षटकात जितेश शर्माने षटकारांचा पाऊस पाडला. जितेश शर्माने सात चेंडूंत चार षटकार लगावत २५ धावांची खेळी केली.
निर्बीजीकरण केंद्र उभारण्याचा प्रस्ताव विचाराधीन - वन मंत्री गणेश नाईक मुंबई : कोकणातील फळबागा आणि…
गागोदे खुर्द अनुसूचित जातीसाठी, १४ ग्रामपंचायतीत आदिवासी सरपंच पेण (वार्ताहर) : पेण तालुक्यातील ६४ ग्रामपंचायत…
हैदराबाद: इंडियन प्रीमियर लीग २०२५मधील ४१व्या सामन्यात आज २३ एप्रिलला सनरायजर्स हैदराबाद आणि मुंबई इंडियन्स…
राजनाथ सिंह यांची दिल्लीत उच्चस्तरीय बैठक; तिन्ही दलांच्या प्रमुखांची उपस्थिती नवी दिल्ली : मंगळवारी जम्मू-काश्मीरमधील…
मुंबई: इंडियन प्रीमियर लीग २०२५मध्ये आज मुंबई इंडियन्स आणि सनरायजर्स हैदराबाद यांच्यात सामना रंगतोय. मात्र…
मुख्यालयातील उपस्थितीचे महसूल विभागाचे काटेकोर आदेश मुंबई: महसूल विभाग जनतेच्या सेवेसाठी असून जनसेवेत कसूर करणाऱ्या…