महिलांनो खासगी बसमध्येही ५० टक्के सवलतीनं फिरा, कसे? घ्या जाणून

गडचिरोली : गुढीपाडव्यानिमित्त महिलांना आणखी एक गुडन्यूज मिळाली आहे. आता खासगी बसमध्येही महिलांना पन्नास टक्के सूट देण्याचा निर्णय घेण्यात आला आहे. एसटी महामंडळाच्या बसेसमध्ये पन्नास टक्के सवलत मिळाल्यानंतर बसमध्ये महिला प्रवाशांची संख्या वाढली होती. त्याचा फटका खासगी प्रवास वाहतूकदारांना बसत होता. त्यामुळे हा निर्णय घेण्यात आल्याचे बोलले जात आहे.

राज्य सरकारच्या निर्णयानंतर गडचिरोली-चंद्रपूर ट्रॅव्हल्स असोसिएशनची एक बैठक झाली या बैठकीत हा निर्णय घेण्यात आला. याबाबत अधिक माहिती देताना, गडचिरोली ते चंद्रपूर मार्गावर खासगी ट्रॅव्हल्समधून प्रवास करणाऱ्या महिलांना तिकीट दरात पन्नास टक्के सवलत देण्याचे जाहीर करण्यात आले असल्याचे असोसिएशनचे अविनाश वरगंटीवार यांनी सांगितले.

दरम्यान, दिलेल्या ५० टक्के सवलतीनंतर आता एसटी महामंडळाने बसमधून प्रवास करणाऱ्या महिलांसाठी काही नियम तयार केले आहेत. मात्र खासगी ट्रॅव्हल्सकडे सध्या तरी अशा प्रकारचे कोणतेही नियम नाहीत. अशा प्रकारचा निर्णय राज्यातील अन्य ट्रॅव्हल्सही घेऊ शकतात. असे घडले तर एसटी महामंडळाप्रमाणेच खासगी ट्रॅव्हल्सचाही निर्णय संपूर्ण राज्यासाठी असेल.