मुंबई पालिकेची मैदाने, उद्याने अधिक वेळ राहणार खुली

पालिका प्रशासनाचा निर्णय

मुंबई (प्रतिनिधी) : पालिकेची मैदाने, उद्याने यांची वेळ वाढविण्याचा निर्णय पालिका प्रशासनाने घेतला आहे. त्यामुळे मुंबई शहरातील महापालिकेची सर्व उद्याने, मैदाने आता रात्री १० वाजेपर्यंत खुली राहणार आहेत.

दर सोमवार ते शुक्रवारी पहाटे ५ ते दुपारी १ आणि दुपारी ३ ते रात्री १० वाजेपर्यंत (एकूण १५ तास) नागरिकांना उद्याने व मैदाने खुली राहतील. तर आठवड्याच्या अखेरीस म्हणजे शनिवार व रविवारी त्याचप्रमाणे सार्वजनिक सुट्टीच्या दिवशी देखील पहाटे ५ ते रात्री १० वाजेपर्यंत (एकूण सलग १७ तास) उद्याने व मैदानांचा लाभ नागरिकांना घेता येणार आहे.

खेळाची मैदाने आणि मनोरंजन मैदाने यांचा सुयोग्य वापर व्हावा तसेच सदर उद्याने, मैदाने, मनोरंजन मैदाने यांचा जास्तीत-जास्त वेळ अधिकाधिक नागरिकांना वापर करता यावा, यासाठी उद्याने व मैदानांच्या वेळेत वाढ करण्यात आली आहे. सध्या महापालिकेची उद्याने व मैदाने ही सकाळी ६ ते दुपारी १२ आणि दुपारी ३ ते रात्री ९ या वेळेत वापरासाठी खुली असतात. तथापि, उद्याने व मैदानांमध्ये येणाऱ्या अबालवृद्धांची संख्या लक्षात घेता, विशेषतः कोविड संसर्ग कालावधीनंतर सुदृढ आरोग्यासाठी जागरुक नागरिकांची वाढलेली संख्या लक्षात घेता दिवसातील जास्तीत-जास्त वेळ उद्याने व मैदाने नागरिकांना वापरासाठी खुली असावीत अशी मागणी नागरिकांकडून होत होती. मुंबई शहर व उपनगरात एकूण २२९ उद्याने, ४३२ मनोरंजन मैदाने, ३१८ खेळाची मैदाने व २६ पार्क आहेत. या सर्व ठिकाणच्या वेळा वाढवल्याने सर्व मुंबईकरांना उशीरापर्यंत फिरता, खेळता येणार आहे, असे उद्यान अधीक्षक जितेंद्र परदेशी यांनी नमूद केले.