पक्षचिन्ह आणि नाव याबाबत ठाकरे गटाच्या याचिकेवर तातडीने सुनावणीस सर्वोच्च न्यायालयाचा नकार

नवी दिल्ली : निवडणूक आयोगाच्या निर्णयानंतर धनुष्यबाण चिन्ह आणि शिवसेना नाव मुख्यमंत्री एकनाथ शिंदेंना मिळाले आहे. केंद्रीय निवडणूक आयोगाने घेतलेल्या निर्णयामुळे उद्धव ठाकरेंनी सुप्रीम कोर्टात धाव घेतली. निवडणूक आयोगाच्या निर्णयाविरोधात ठाकरे गटाने आज सुप्रीम कोर्टात याचिका दाखल करण्याचा प्रयत्न केला. मात्र सुप्रीम कोर्टाने आज याचिका दाखल करून घेण्यास नकार दिला आहे. कोर्टाने त्यांना उद्या मेन्शनिंग लिस्ट अंतर्गत येण्यास सांगितले आहे.

तीन दशकांपासून शिवसेनेची ओळख, शिवसेनेची अस्मिता असलेले धनुष्यबाण चिन्हच नव्हे तर शिवसेना हा पक्षही शिंदेना मिळाला. आता ठाकरेंच्या पक्षाला नव्या नावासाठी, नव्या चिन्हासाठीही संघर्ष करावा लागणार आहे. चिन्हाबाबत वाद झाल्यानंतर निवडणूक आयोगाने ठाकरे गटाला दिलेले मशाल हे चिन्ह आणि शिवसेना उद्धव बाळासाहेब ठाकरे हे नाव तात्पुरते होते. निकालात आयोगाने स्पष्ट म्हटले आहे की हे तात्पुरते नाव, चिन्ह कसबा, चिंचवडची पोटनिवडणूक संपेपर्यंतच त्यांना वापरता येईल. पुन्हा मशाल मिळवण्यासाठी, नव्या पक्षाच्या नावासाठी त्यांना नव्याने प्रक्रिया करावी लागणार आहे.