काळा घोडा महोत्सवाला सुरुवात, ‘या’ तारखेपर्यंतच सुरु?

मुंबई: दरवर्षी होणारा काला घोडा कला महोत्सव कोरोना महामारीच्या दोन वर्षांनंतर पुन्हा एकदा सुरु झाला आहे. आज सुरु झालेला हा महोत्सव पुढील ९ दिवस म्हणजेच १२ फेब्रुवारी पर्यंत सुरु राहणार आहे. दरवर्षी उभारण्यात येणाऱ्या विशिष्ट कलाकृती पाहण्यासाठी लोक येथे गर्दी करतात. यावेळी या महोत्सवात नक्की काय काय पाहायला मिळणार याची लोकांमध्ये उत्सुकता आहे.

नृत्य, संगीत, व्हिज्युअल आर्ट्स, थिएटर, साहित्य, खाद्यपदार्थ, बालसाहित्य याची रेलचेल असणाऱ्या या महोत्सवात मागील वेळी दिड लाख लोक उपस्थित होते असे सांगण्यात आले. के दुबाश मार्ग, रॅम्पर्ट रो, यशवंतराव चव्हाण सेंटर, क्रॉस मैदान आणि कूपरेज बँडस्टँड येथे या महोत्सवानिमित्त विविध कार्यक्रम आयोजित करण्यात आले आहेत. या महोत्सवाचा एक महत्वाचा भाग म्हणजे हेरिटेज वॉक.

कला आणि साहित्याची आवड असलेल्यांना काला घोडा कला महोत्सवात पाहण्यासारखे बरेच काही आहे आणि त्यासाठी एक दिवस पुरेसा नाही. जवळच एशियाटिक लायब्ररी, जहांगीर आर्ट गॅलरी आणि नॅशनल गॅलरी ऑफ मॉडर्न आर्टला आवर्जून भेट द्या. खवय्यांनी येथील आयकॉनिक इराणी रेस्टॉरंटला नक्की भेट द्यायला हवी. फॅशन प्रेमी असाल आणि खरेदीची आवड असेल, तर या कुलाबा कॉजवेकडे तुम्हाला स्वस्तात मस्त गोष्टी मिळतील.

काळा घोडा म्हणजे काय?

या उत्सवाला त्याचे नाव त्याच्या जवळ असलेल्या काळा घोडा या पुतळ्यावरून मिळाले. काळा घोडा हा साऊथ मुंबईच्या इतिहासाचा आणि उत्सवाचा महत्त्वाचा भाग आहे. वास्तुविशारद अल्फाज मिलर आणि श्रीहरी भोसले यांनी हा ‘स्पिरिट ऑफ काला घोडा’ पुतळा साकारला होता.