दारुविक्रेत्याला महिलांनी चोपले!

सातारा : बेकायदा दारू विक्री करणा-या दुकानदाराला महिलांनी कपडे फाटेपर्यंत चोप दिल्याची घटना साता-यामधील चिलेवाडी येथे घडली. रौद्ररूप धारण केलेल्या गावातील महिलांनी या दारुच्या दुकानावर हातात दांडकी घेऊन हल्ला केला. यावेळी संतप्त महिलांनी दारुच्या बाटल्याही रस्त्यावर आणून फोडल्या.

याचा व्हिडीओ सध्या सोशल मीडियावर चांगलाच व्हायरल होत आहे. महिलांनी नंतर दुकानदाराला वाठार पोलिसांच्या ताब्यात दिले. मार खाताना मात्र दुकानदार मला मारु नका मी पुन्हा दारु विकणार नाही, असे वारंवार सांगत असल्याचे या व्हिडीओमध्ये दिसत आहे.

गावाच्या वेशीवर असलेल्या दुकानात बेकायदा दारु विक्री केली जाते आणि आमचे पती तिथे दारु पिण्यासाठी जातात आणि घरी येऊन तमाशा करतात, असे म्हणत गावातील महिलांनी या दारुच्या दुकानावर हातात दांडकी घेऊन हल्ला केला.