कोल्हापूर जिल्हा बँकेच्या ईडी छापेमारीत पाच अधिकारी ताब्यात

कोल्हापूर : कोल्हापूर जिल्ह्यातील राष्ट्रवादी काँग्रेसचे नेते, माजी कामगार मंत्री, आमदार हसन मुश्रीफ यांच्यासह त्यांचे निकटवर्तीय तसेच त्यांच्याशी निगडीत संस्थांवर ईडीची छापेमारी सुरुच आहे. सलग दोन दिवसांपासून सुरू असलेल्या छापेमारीत पाच अधिका-यांना ताब्यात घेतले आहे.

बुधवारी (१ फेब्रुवारी) ईडीच्या पथकाने सकाळी अकरा वाजल्यापासून ते रात्री अकरा वाजेपर्यंत असा १२ तासांहून अधिक काळ तिन्ही कार्यालयात ठाण मांडून चौकशी केली होती, या पथकात स्थानिक दोन बँक अधिकाऱ्यांसह एकूण आठ अधिकाऱ्यांच्या समावेश होता. रात्री १० नंतर एकूण २२ अधिकाऱ्यांनी बँकेचे अध्यक्ष अध्यक्ष मुश्रीफ तसेच उपाध्यक्ष राजू आवळे यांच्या दालनातील कागदपत्रांची तपासणी केली.

तर गुरुवारी सुद्धा ईडीची कारवाई सुरु राहिली. कोल्हापूर जिल्हा मध्यवर्ती सहकारी बँकेचे मुख्य कार्यकारी अधिकारी डॉ. ए. बी. माने यांच्यासह मुख्यालयातील पाच अधिकाऱ्यांना ईडीच्या पथकाने गुरुवारी सायंकाळी ताब्यात घेतले. त्यांना पोलीस बंदोबस्तात मुंबईला नेण्यात आले आहे. ईडीने तब्बल ३० तास ब्रिक्स व संताजी घोरपडे साखर कारखान्याची संबंधित सर्व व्यवहारांची कसून चौकशी केली. गुरुवारी सायंकाळी मुख्य कार्यकारी अधिकारी माने, पत देखरेख विभागाचे व्यवस्थापक आर. जे. पाटील, सहाय्यक व्यवस्थापक अल्ताफ मुजावर, निरीक्षक सचिन डोणकर आणि राजू खाडे यांना समन्स बजावून ईडीच्या पथकाने ताब्यात घेतले.

मिळालेल्या माहितीनुसार, सरसेनापती संताजी घोरपडे, ब्रिक्स, बिद्री व भोगावती सहकारी साखर कारखान्याच्या व्यवहारांबाबत चौकशी झाल्याची माहिती आहे. संबंधित अधिकाऱ्यांकडून कर्ज प्रकरणाबाबत माहिती घेऊन चौकशी करण्यात आली. कापशी शाखेतील सर्व शेतकरी ठेव पावत्यांची झेरॉक्स प्रत घेतल्याची माहिती आहे.

याआधी ११ जानेवारी रोजी केलेल्या छापेमारीनंतर हसन मुश्रीफ अध्यक्ष असलेल्या कोल्हापूर जिल्हा मध्यवर्ती सहकारी बँक शाहूपुरी येथील मुख्य कार्यालय, कागल तालुक्यातील सेनापती कापशी तसेच गहहिंग्लज तालुक्यातील हरळी जिल्हा बँकेच्या शाखेत, तसेच सरसेनापती संताजी घोरपडे साखर कारखाना या ठिकाणी तब्बल ३० तास छापेमारी केली.