मुंबई : अमूलने दुधाच्या दरात प्रति लिटरमागे तीन रुपयांनी वाढ केली आहे. दुधाचे वाढलेले दर आजपासून म्हणजेच ३ फेब्रुवारीपासूनच लागू होणार आहेत.
कंपनीच्या म्हणण्यानुसार, आता अमूल ताजाचे अर्धा लिटर दूध २७ रुपयांना मिळणार आहे. तर १ लिटर पॅकेटसाठी ५४ रुपये मोजावे लागणार आहेत.
अमूल गोल्ड अर्थात फुल क्रीम दुधाचे अर्धा लिटरचे पॅकेट आता ३३ रुपयांना मिळणार आहे. तर १ लिटरसाठी ६६ रुपये मोजावे लागतील.
अमूल गायीच्या एक लिटर दुधाचा दर ५६ रुपयांवर पोहोचला आहे. अर्ध्या लिटरसाठी २८ रुपये मोजावे लागणार आहेत. तर म्हशीचे दूध आता ७० रुपये प्रतिलिटर दराने उपलब्ध होणार आहे.
अमूलने तीन महिन्यापूर्वीच ऑक्टोबरमध्ये दुधाच्या दरात प्रतिलिटर दोन रुपयांनी वाढ केली होती. एकूणच कामकाजाचा खर्च आणि दुधाचे उत्पादन वाढल्याने ही दरवाढ करण्यात आल्याचे सांगण्यात आले होते.
