मुंबई: दादरमधील शिवसेना भवनासमोरील रस्त्यावर एका कारला भीषण आग लागल्याची घटना घडल्याने काही काळ खळबळ उडाली. दुपारच्या सुमारास ही आग लागली. संपूर्ण कार आगीच्या भक्ष्यस्थानी पडली. रस्त्याच्या कडेला उभ्या असलेल्या गाडीला आग लागल्याने काही काळ येथील वाहतूक थांबवण्यात आली होती.
ज्या कारला आग लागली ती एक खासगी वॅगनआर गाडी होती. कोहिनूर स्वेअरमधून पाण्याचा मारा करुन आग विझवण्याचा प्रयत्न काही मिनिटांनंतर सुरक्षारक्षकांनी केला. दरम्यानच्या काळात आजूबाजूची दुकानं बंद करण्यात आली. अग्निशमन दलाची गाडी स्थानिकांनी आग विझवेपर्यंत पोहचलेली नव्हती.
आग विझवण्यात आल्यानंतर अग्निशमन दलाचे जवान घटनास्थळी दाखल झाले असून कुलिंग ऑप्रेशन सुरु करण्यात आलं आहे. गाडीमध्ये इतर काही ज्वलनशील पदार्थ नाहीत ना, या गाडीला पुन्हा आग लागण्याची शक्यता नाही ना यासंदर्भातील चाचपणी अग्निशमन दलाने केली.
