भिवंडी : भिवंडी शहरालगतच्या खोणी ग्रामपंचायत हद्दीतील खाडीपार या भागात रस्त्यालगत असलेल्या मूलचंद कंपाऊंड येथे एका इमारतीचा पुढील काही भाग कोसळल्याने झालेल्या दुर्घटनेत एक व्यक्तीचा मृत्यू झाला.
पहाटे साडेतीन वाजताच्या सुमारास झालेल्या दुर्घटनेत इमारती लगत रस्त्याकडेला आठ दुकानाचे गाळे बनवण्यात आले होते. या दुकानांवर इमारतीच्या स्लॅबचा भाग कोसळून ही दुर्घटना घडली. यावेळी कपड्याचे दुकान असलेल्या गाळ्यामध्ये दुकानचालक माजिद अन्सारी (वय २५) हा झोपलेला असल्याने त्याच्यावर इमारतीचा ढिगारा कोसळल्याने त्याचा जागेवरच मृत्यू झाला.
या दुर्घटनेची माहिती मिळतात भिवंडी अग्निशामक दलाच्या गाड्या घटनास्थळी दाखल होऊन त्यांनी ढिगारा उपसून त्यामध्ये अडकलेला मृतदेह बाहेर काढून तो शवविच्छेदनासाठी शासकीय रुग्णालयात पाठवला आहे.
दरम्यान घटनास्थळी पोलीस अधिक चौकशी करत आहेत. धोकादायक इमारतींना नोटीस बजावण्यात आली आहे. पण कोणतीही कारवाई करण्यात येत नाही. त्यामुळे अशा घटना घडत असतात. अशी चर्चा नागरिकांमध्ये आहे.
