संजय शिरसाटांना हृदयविकाराचा झटका

औरंगाबाद/मुंबई : औरंगाबाद पश्चिमचे शिंदे गटाचे आमदार संजय शिरसाट यांना काल दुपारी हृदयविकाराचा झटका आला. त्यांच्यावर औरंगाबादमधील सिग्मा रुग्णालयातील उपचारानंतर त्यांना आज सकाळी तातडीने एअर अ‌ॅम्बुलन्सने मुंबईतील लिलावती रुग्णालयात हलवण्यात आले आहे.

संजय शिरसाठ यांचे चिरंजीव सिद्धांत शिरसाट यांनी सांगितले की, संजय शिरसाट यांच्यावर मुंबईतील लिलावती रुग्णालयात उपचार करण्यात येत आहेत. त्यांना आयसीयूमध्ये भरती करण्यात आले आहे. सध्या त्यांची प्रकृती स्थिर आहे

संजय शिरसाट यांच्या छातीत कालपासून दुखत होते. त्यामुळे जिल्हा नियोजन समितीच्या बैठकीतून ते अगोदरच निघून गेले होते. त्यानंतर काल दुपारी ४ वाजेच्या सुमारास त्यांच्यावर सिग्मा हॉस्पिटलमध्ये उपचार करण्यात आले होते. दरम्यान, मुख्यमंत्री एकनाथ शिंदेही त्यांची लिलावतीमध्ये भेट घेणार आहेत.

दरम्यान, शिरसाट यांच्यावर काल रात्री उपचार करण्यात आल्यानंतर त्यांच्या तब्येतीत सुधारणादेखील झाली. अँजिओग्राफीनंतर संजय शिरसाट यांनी मुंबईत उपचार घेण्याची इच्छा व्यक्त केली. त्यामुळे आज सकाळी एअर अ‌ॅम्बुलन्सने त्यांना मुंबईला रवाना करण्यात आले. संजय शिरसाट यांची तब्येत आता बरी आहे. केवळ काळजी म्हणून त्यांना मुंबईला हलवण्यात आले, अशी माहिती सिग्मा हॉस्पिटल प्रशासनाच्यावतीने देण्यात आली आहे.