दोडामार्ग (प्रतिनिधी) : दोडामार्गमधील पिकुळे लाडाचेटेंब गावामधील शेतकरी कृष्णा काशीराम महालकर यांना रात्री दोनच्या सुमारास दुर्मीळ असे खवले मांजर आपल्या परसबागेत अडकले असल्याचे निदर्शनास आले. त्यांनी कुत्रे व इतर नैसर्गिक शिकारी यांचेपासून त्याचे संरक्षण करून त्याला अभय दिले. सदरची घटना सकाळी वनपरिक्षेत्र अधिकारी कार्यालय दोडामार्ग येथे कळविली.
सदरची माहिती मिळताच वनपरिक्षेत्र अधिकारी कार्यालय दोडामार्गचे बचावपथक घटनास्थळी तात्काळ दाखल झाले व ते खवले मांजर वैद्यकीय तपासणी व उपचारासाठी ताब्यात घेण्यात आले. त्या खवले मांजरावर वन्यपशुवैद्यकीय डॉक्टर यांचेमार्फत तपासणी करून ते पुर्णतः निरोगी असल्याचे सांगीतल्यानंतर त्याला नैसर्गिक अधिवासात सोडण्यात आले.
जगात सर्वातजास्त शिकार व तस्करी होणाऱ्या या अशा दुर्मीळ खवलेमांजराच्या संरक्षण व संवर्धनासाठी वनविभाग दोडामार्ग येथील वनक्षेत्रपाल मदन क्षीरसागर यांनी खवलेमांजर वाचवा मोहीम राबविली आहे. या अंतर्गत वनपरिक्षेत्र अधिकारी दोडामार्ग मदन क्षीरसागर यांनी आपल्या दोडामार्ग तालुक्यातील शेतकरी व नागरीक बांधवांना या दुर्मिळ खवलेमांजराच्या संवर्धन व संरक्षणाकामी सहकार्य करण्याचे आवाहन केले होते.
या मोहिमेत सहभागी होत खवलेमांजराची माहिती वनविभागाला वेळेत कळवून त्या खवलेमांजराचे प्राण वाचवण्यासाठी वनविभागाच्या वतीने सदर शेतकरी श्री. कृष्णा काशीराम महालकर यांचे आभार मानून त्यांना आपल्या कोकणातील या दुर्मिळ अशा वन्यजीवाच्या, खवलेमांजराच्या संवर्धनासाठी प्रोत्साहन म्हणून एक हजार रुपये बक्षीस देण्यात आले. या कामगिरीमध्ये वनक्षेत्रपाल दोडामार्ग कार्यालयाचे वनपाल माणेरी संग्राम जितकर, वनरक्षक दत्तात्रय मुकाडे, वनमजुर विश्राम कुबल, संतोष शेटकर व इतर सर्व दोडामार्ग परिक्षेत्र कार्यालय स्टाफ यांनी महत्वाची भूमिका निभावली.