सुधागड-पाली (वार्ताहर) : पर्यावरण स्नेही व पर्यावरणपूरक गणेशोत्सव साजरा करण्यासाठी अनेकजण पुढाकार घेत आहेत. त्यामुळेच सजावटीसाठी आता थर्माकोल, प्लास्टिक आदी साहित्याव्यतिरिक्त नैसर्गिक व विघटनशील अशा साधनांचा वापर केला जात आहे. त्यामध्ये शोभिवंत झाडे, फुलझाडे आणि कुंड्यांना विशेष मागणी आहे. त्यामुळे जिल्ह्यात ठिकठिकाणी रोपवाटिका सजल्या आहेत. पर्यावरण संवर्धनाबरोबरच या झाडांमुळे सुंदरता व आकर्षकपणादेखील येतो. शिवाय ही झाडे नंतर परसबागेची शोभादेखील वाढवितात.
पेण येथील सुहास पाटील यांनी प्रहारला सांगितले की, गेली अनेक वर्षे इकोफ्रेंडली आरास बनवितो. त्यामध्ये आकर्षक फुले व शोभिवंत झाडांचा वापर करतो. त्यामुळे पर्यावरण संवर्धनदेखील होते. शिवाय ही फुले किमान ५ दिवस टवटवीत राहतात. सध्या अनेक नर्सरी चालकांनी अशा स्वरूपाची शोभिवंत व फुलझाडे आणि विविध आकाराच्या व रंगाच्या कुंड्यादेखील आपल्या नर्सरीमध्ये विकण्यास ठेवल्या आहेत. तसेच गणेशोत्सवासाठी विशेष सूट व आकर्षक योजनादेखील दिल्या आहेत. त्यामुळे पर्यावरणपूरक कापडी, कागदी व पुठ्ठ्याच्या मखरांबरोबरच आता शोभिवंत फूल व झाडेदेखील पर्यावरणपूरक गणेशोत्सव साजरा करण्यासाठी योगदान देत आहेत.
पर्यावरणाचे भान राखून कोणतेही सण व उत्सव साजरे केले पाहिजेत. त्यामुळेच नर्सरीत माफक दरात शोभिवंत झाडे व फुलझाडे तसेच कुंड्या विक्रीसाठी ठेवल्या आहेत. याबरोबरच या सर्वांची मांडणी व रचना कशी करावी याची माहिती व कल्पना मोफत देत आहे. त्यामुळे पर्यावरणपूरक गणेशोत्सव साजरा करण्यास थोडा हातभारदेखील लागत आहे. - अमित निंबाळकर, मालक, ग्रीनटच नर्सरी, पाली